“284 саты жоғарылады“: қазақстандық теннисші WTA рейтингінде көтерілді

20 жастағы қазақстандық спортшы өткен аптада Испанияның Виго қаласында W35 сериялы турнирінде топ жарса, оған дейін Оренседегі W75 титулын иеленген болатын. Бұл жетістік Жиенбаеваға WTA рейтингінде 738-орыннан 454-орынға көтерілуге мүмкіндік берді.

Айта кетейік, осындай қарқынды ілгерілеудің арқасында Соня Жиенбаева Елена Рыбакина (WTA рейтингінде екінші сатыда) мен Юлия Путинцевадан (81-орын) кейінгі Қазақстанның үшінші ракеткасы атанды.

Ұлттық рейтингте ол тәжірибелі теннисшілер - Жібек Құламбаева (464-орын) мен Аружан Сағандықованы (625-орын) артқа тастады.

Испаниядағы W35 турнирі

Соня Жиенбаева Испанияның Виго қаласында өткен W35 санатындағы турнирдің жеңімпазы атанды. Финалда 20 жастағы спортшы қытайлық Юфей Ренді 7:6 (8:6), 7:5 есебімен жеңді.

Бұл титул Жиенбаева үшін қатарынан екінші жеңіс болды. Бір апта бұрын ол Оренседегі W75 турнирінің финалында болгариялық Изабелла Шиникованы қапы қалдырып, жеңіске жеткен еді.

Осылайша, қазақстандық теннисші Испаниядағы екі апта ішінде W75 және W35 сериялы екі трофейді қанжығасына байлады.

Соня Жиенбаева деген кім?

Жас қазақстандық теннисші Соня Жиенбаева 2006 жылы Алматыда дүниеге келген, бірақ кішкентай кезінде ата-анасымен бірге Германияға қоныс аударған. Оның анасы - қазақ, әкесі - неміс.

2024 жылы Жиенбаева халықаралық жарыстарда Қазақстан намысын қорғауға шешім қабылдап, спорттық азаматтығын ауыстырды.

2024 жылы Соня алғаш рет ұлттық құрамаға шақырту алды. Ол Астанада өткен Билли Джин Кинг кубогы аясындағы матчте команданың Канаданы жеңуіне септігін тигізді.

Фото: TengriNews.kz/ Маржан Қуандықова

20 жасқа дейін Соня ITF сериясының төрт турнирінде жеңіске жетіп үлгерді.

Бұған дейін Соня Жиенбаева Елена Рыбакина, Юлия Путинцева, Анна Данилина және Жібек Құламбаевамен бірге теннис бойынша Қазақстан құрамасының сапында Билли Джин Кинг кубогының финалдық кезеңіне енген болатын. Бейресми әлем чемпионаты саналатын турнир қыркүйек айының соңында Қытайда өтеді.