UFC басшысы Шавкат Рахмоновтың оралуына қатысты пікір білдірді

Дана Уайт жартылай орта салмақтағы жеңіліссіз келе жатқан файтерлер – қазақстандық Шавкат Рахмонов пен эквадорлық Майкл Моралес арасындағы ықтимал жекпе-жекке қатысты пікір білдірді.

UFC басшысы бұл кездесу 2027 жылдың басына жоспарланғанын айтты. Сондай-ақ Уайт қаңтар-ақпанда UFC-де ірі әрі қызықты көптеген жекпе-жек жарияланатынын атап өтті.

- Қазір желіде Майкл Моралес пен Шавкат Рахмонов арасында біраз сөз таласы жүріп жатыр. Промоушеннің бұл жекпе-жекті 2027 жылы ұйымдастыру жоспары бар ма?

- Мүмкін. Бұл әбден мүмкін. Қазір бізде кеше талқыланған керемет көптеген жоба бар. Алда көптеген жақсы анонс күтіп тұр. Қаңтар мен ақпан өте күшті болады, - деп жауап берді Дана Уайт.

Dana White is looking forward to the start of 2027 👀 [ Full Interview HERE! https://t.co/mT9yqz5cDl ] https://t.co/0f0RP3GBpe

— UFC on Paramount+ (@UFConParamount) October 14, 2026

Tengri Sport тілшісі қазақстандық жұлдыздың бапкері Эдуард Базровқа хабарласты. Ол қазір команда оқу-жаттығу жиынында екенін айтты.

Сондай-ақ ол Моралес Рахмоновтың UFC-ге оралуы үшін лайықты қарсылас деген пікір білдірді, бірақ оны жеңген күннің өзінде қазақстандыққа Ислам Махачевпен титулдық жекпе-жекке кепілдік берілмейтінін айтты.

"Қазір біз таудамыз, жаттығуларымыз өтіп жатыр, жекпе-жектерге дайындалып жатырмыз. Дана Уайттың не айтқанын білмеймін, бұл туралы менде ешқандай ақпарат жоқ, сондықтан Шавкаттың октагонға қашан оралатынын әзірге нақты айта алмаймын. Моралес жеңіліп көрмеген, физикалық тұрғыдан өте мықты, соққысы ауыр, қауіпті файтер. Егер осындай жекпе-жек болып, ол жеңіске жеткен күннің өзінде, Шавкат титулға таласатын тізімде бірінші бола ма, оны айта алмаймын. Ол жерде Шавкаттан бөлек үміткерлер жеткілікті, сондықтан оны уақыт көрсетеді", - деді Базров Tengri Sport-қа берген сұхбатында.

Еске сала кетейік, бұған дейін Эдуард Базров біздің редакцияға берген сұхбатында, егер бәрі жоспар бойынша болса, Шавкат Рахмонов 2027 жылдың көктеміне қарай жекпе-жекке шығуға дайын болатынын айтқан еді.

"Шавкаттың оралуына келетін болсақ – бұл ақпан немесе наурыздың басы, шамамен осы уақыт. Егер бәрі жақсы болып, біздің сценарийімізбен жүрсе, ал әзірге бәрі солай болып жатыр, ол шамамен осы мерзімде оралуы мүмкін", – деді бапкер.

Моралес Рахмоновты жекпе-жекке шақырды

Айта кетейік, бұған дейін Майкл Моралес әлеуметтік желідегі парақшасында UFC-дің жартылай орта салмақтағы чемпионы Ислам Махачевке арнап видео жариялаған болатын.

Ол жұдырықтасуға дайын екенін, бірақ UFC Махачевке басқа топ-файтер - Карлос Пратеске қарсы жекпе-жек белгілесе, өзінің 2027 жылға жоспарлаған қарсыласы бар екенін мәлімдеді.

Эквадорлық спортшы келесі жылы Шавкат Рахмоновқа қарсы жекпе-жек өткізетінін мәлімдеді.

"Бірақ, жігіттер, егер сендердің басқа жоспарларың болса... Ислам, егер сен жеңіл қарсылас қалап, Пратесті таңдасаң, онда менің 2027 жылға жоспарлаған жекпе-жегім бар. Бұл дивизионның соңғы қожайыны - Шавкат Рахмонов. Мені қайдан табуға болатынын білесіңдер", - деді Моралес.

Моралес – UFC рейтингіндегі жеңіліп көрмеген соңғы файтер

Айта кетейік, эквадорлық файтер UFC рейтингінің үздік 15 спортшысы арасында 19-0 рекордымен мінсіз нәтиже көрсетіп тұрған жалғыз өкіл. Дәл осындай көрсеткіш қазақстандық жұлдыз Шавкат Рахмоновта да бар.

Моралес кейінгі рет октагонға 2025 жылдың 15 қарашасында Нью-Йорктегі (АҚШ) "Мэдисон-сквер-гарден" аренасында өткен UFC 322 турнирі аясында шықты. Онда ол тәжірибелі америкалық Шон Брэдимен кездескен болатын.

Жекпе-жек бірінші раундта-ақ мерзімінен бұрын аяқталды. Моралес алғашқы секундтардан басымдықты иеленіп, Брэдиге жойқын қысым мен дәл соққылар бағыттады. Раундтың ортасында ол қарсыласын қарымды соққылар сериясымен ұстап алып, нокаутқа түсірді.

UFC чемпионы мансабын аяқтап, боксқа ауысу туралы шешім қабылдады