UFC-дегі ең жылдам нокаут авторы атанған қазақстандық жаңа лигадағы жекпе-жектен шет қалды

Грузиялық RKENA аралас жекпе-жек промоушенінің баспасөз қызметі қазақстандық спортшы Бекзат Алмахан мен Абдул Камара арасындағы кездесу өтпейтінін мәлімдеді. Промоушеннің хабарлауынша, отандасымыздың денсаулығына байланысты мәселелер туындаған. Оның орнына тағы бір қазақстандық Бахтияр Несіпбек шығады.

Айта кетейік, RKENA ұйымының бұл турнирі әлемге әйгілі әрі ықпалды PFL промоушенімен бірлесіп өткізілмек.

Бастапқыда Несіпбек осы турнирдің прелим кардында ирандық Сейед Әли Аслимен кездесуі тиіс болатын.

RKENA - 2025 жылы негізі қаланған грузиялық жас аралас жекпе-жек промоушені. Оның басты мақсаты - грузиялық және аймақтық ММА-ның жаңа дәуірін қалыптастыру. Ұйым жергілікті және халықаралық таланттарды дамытуға, файтерлерді әлемдік топ-лигаларға (UFC, PFL, ONE) дайындауға және тартысты турнирлер өткізуге басымдық береді.

Бекзат Алмахан - UFC-дегі ең жылдам нокауттың авторы

Еске сала кетейік, бұған дейін Бекзат Алмахан UFC-де өнер көрсеткен. Ол әлемнің ең мықты лигасында 4 жекпе-жек өткізіп, 1 жеңіс және 3 жеңіліске ие болды. Соған қарамастан, қазақстандық спортшы мықты қарсыластарға қарсы тартысты кездесулерімен есте қалды. Оның қарсыластары қатарында дивизионның ең үздік өкілдерінің бірі - Умар Нурмагомедов пен Александр Топурия болды. Қазақстандық файтер олардан төрешілердің бірауызды шешімімен жеңілген еді.

Алайда Алмаханның UFC-дегі ең басты жетістігі - канадалық Брэд Катонаны нокаутқа түсіруі. Бұл жекпе-жек бірінші раундта-ақ мерзімінен бұрын аяқталды. Гонг соғылғаннан кейін 63 секунд өткенде Алмахан қарсыласына дәл соққы бағыттап, оны нокдаунға түсірді, содан кейін соққының астына алған соң төреші кездесуді тоқтатуға мәжбүр болды.

Бұл промоушен тарихында қазақстандық файтерлер жасаған ең жылдам нокаут болып тіркелді.

UFC басшысы Шавкат Рахмоновтың оралуына қатысты пікір білдірді