UFC-дің бұрынғы чемпионы Еркебұлан Тоқтарды жекпе-жекке шақырды

UFC-дің экс-чемпионы Энтони Петтис қазақстандық танымал MMA файтері Еркебулан Тоқтарды жекпе-жекке шақырды. Тоқтар бұл үндеуден бас тартпады, - деп хабарлайды Tengri Sport спортшылардың әлеуметтік желілеріне сілтеме жасап.

Жеңіл салмақтағы UFC-дің бұрынғы чемпионы, титулды 2013 жылы жеңіп алған спортшы қазір Алматыда жүр және Әділ Боранбаевқа қарсы жекпе-жекке дайындалып жатыр.

Әлеуметтік желілерге сүйенсек, АҚШ жұлдызына Қазақстанның ұнағаны соншалық, ол мұнда бір емес, бірнеше кездесу өткізуге дайын екенін байқатады.

"Еркебұлан, қайдасың? Келесі қадам сенен", - деді Петтис.

Тоқтар жазбаның астына басқа қалада жүргенін айтып, бірден жауап берді. Кейіннен өз парақшасында қысқа ғана мәлімдеме жасады.

"Let’s go, champ", - деп жауап қатты Тоқтар.

Айта кетейік, Қазақстанға келгенге дейін Энтони Петтис сегізбұрышқа 2022 жылдан бері шықпаған болатын. Сол кезде ол PFL жартылай финалында Стиви Рейден төрешілер шешімімен жеңіліп қалған еді.

Жалпы алғанда, 39 жастағы америкалықтың кәсіпқой MMA-да 25 жеңісі мен 14 жеңілісі бар.

Еркебұлан Тоқтар деген кім?

Тоқтар - ұзақ уақыт бойы поп-MMA-да өнер көрсетіп, кейін кәсіпқой жекпе-жекке ауысқан қазақстандық актер. Қазіргі уақытта оның рекорды - 11-3.

Арменияда өткен соңғы жекпе-жегінде Тоқтар төрешілердің шешімімен Қырғызстан өкілі Марсель Нұрланбек ұлынан жеңіліп қалды.

Қазір Тоқтар Қазақстандағы поп-MMA-ның ең танымал өкілі - оның парақшасына 2,3 миллион адам жазылған.