“Белбеуге жол ашады“: Асу Алмабаевтың UFC-дегі жаңа қарсыласы туралы не белгілі?

Бұған дейін әлеуметтік желілерде UFC-дегі қазақстандық файтер Асу Алмабаевтың келесі қарсыласы аралас жекпе-жектің ардагері, жапондық Киоджи Хоригути болады деген ақпарат тараған болатын.

Tengri Sport тілшісі қазақстандықтың бапкері Эдуард Базровпен байланысып, ол бұл ақпаратты растады. Маманның айтуынша, жекпе-жекке келісімшарт жасалып қойған, ал кездесу 22 қарашада Дохада (Қатар) ABHA Arena-да өтетін UFC турнирінде болады.

"Қарсылас ресми түрде белгілі болды. Оны немесе Ройвалды беруі мүмкін екенін білдік. Сондықтан келісімшартқа әзірге қол қоймаған едік. Қазір бәрі түпкілікті шешіліп, келісімшартқа қол қойылды. Жекпе-жек 21 қарашаға (жергілікті уақыт бойынша) белгіленді. Қарсылас - Киоджи Хоригути", - деді Базров Tengri Sport-қа берген сұхбатында.

Қарсылас жарияланғанға дейін Алмабаевтың қарсыласы ретінде америкалық Брэндон Ройвал қарастырылған болатын. Ол бұған дейін қазақстандықты жекпе-жекке шақырғанымен, бұл бастама нәтижесіз аяқталды. Базров Ройвалдың жекпе-жектен бас тартуына қатысты түрлі нұсқаларды естігенін айтты.

Бапкердің пікірінше, америкалықпен жекпе-жек Алмабаев үшін тиімдірек болар еді.

"Біреулер отбасылық жағдайына байланысты десе, енді бірі тізе жарақаты деді. Бірақ біз оны (Ройвалды - ред. ескерт.) көрдік, ол жаттығып жүр, жұмыс істеп жатыр. Қысқасы, Асумен төбелескім келеді деп алып, кейін тайқып шықты. Мен мұны осылай қабылдаймын. Жалпы, біріншіден, рейтингте бізден жоғары тұрған файтермен жұдырықтасу өте тиімді болар еді. Қазір Киоджи рейтингте Ройвалдан төмен, бірақ дағдысы, тәжірибесі, күші мен жалпы спортшы ретіндегі деңгейі жағынан Ройвалдан еш кем түспейді. Мүмкін кейбір тұстарда тіпті басым да шығар", - деп бөлісті бапкер.

Дегенмен, бапкер команданың кез келген қарсыласқа дайындалуға уақыты жеткілікті екенін айтты. Базровтың сөзінше, олар қазірдің өзінде Хоригутиге антропометриялық деректері ұқсас спарринг-серіктестер іздестіріп жатыр.

"Кез келген қарсыласқа дайындалу үшін уақытымыз жетеді. Дайындық қарсыласқа қарай жекелей жүргізіледі. Қазір антропометриясы мен стилі жағынан Киоджиге ұқсайтын спортшыларды таңдап жатырмыз. Барынша ұқсас спарринг-серіктестер табуға тырысамыз. Ол өте жылдам, күресі де жақсы. Қашықтықты жақсы сезеді, аяқпен жұмысы (футворк) жоғары деңгейде. Сондықтан оған қарсы тұру үшін үлкен жұмыс атқаруымыз керек", - деп толықтырды маман.

Сондай-ақ бапкер Хоригутиді жеңу Асу Алмабаевқа көптен күткен титулдық жекпе-жекке жол ашатынын атап өтті.

"Асу UFC-де 8 жекпе-жек өткізіп, соның 7-інде жеңіске жетті. Менің ойымша және көпшілік мұнымен келіседі, егер ол Киоджи Хоригутиден өтсе, бұл - белбеуге тікелей жолдама. Титул беру үшін ол тағы қанша жекпе-жек өткізуі керек? Ол мықты, әртүрлі стильдегі қарсыластарды жеңе алатынын дәлелдеді", - деді Базров.

Базровтың айтуынша, Асудың барлық жекпе-жегіндегі басты қаруы - дұрыс әрі сауатты дайындық. Бұл жолы да солай болады деп есептейді бапкер.

"Тағы да қайталап айтамын, Асудың басты қаруы - біздің дайындығымыз. Қарсыласқа кілт таба білу қабілетіміз. Егер дайындықтың белгілі бір кезеңінен өтпесең, бабыңда болмасаң, ештеңе істей алмайсың. Ең бастысы - бабында болып, жекпе-жекке шығып, өзіңнің ең үздік нұсқаңды көрсету. Біз қарсыласты зерттейміз. Оны бірінші жыл біліп отырған жоқпыз, мен оны бұрыннан танимын, сондықтан оның мықты және әлсіз тұстарын жақсы білеміз", - деді маман.

Асу Алмабаев - UFC-дегі үздік қазақстандық

Асу Алмабаев - Жанаталап ауылының тумасы, 32 жастағы файтер. Қазіргі таңда ол UFC рейтингінің топ-15 тізіміне енген еліміздің жалғыз өкілі (аса жеңіл салмақ рейтингінде 7-орында).

Еске сала кетейік, Асу Алмабаев соңғы рет октагонға 28 маусымға қараған түні Бакуде (Әзербайжан) өткен UFC Fight Night 280 турнирінде шыққан болатын. Онда қазақстандық файтер америкалық Чарльз Джонсонды мерзімінен бұрын жеңді.

Жекпе-жектің үшінші раундында Алмабаев қарсыласын партерге түсіріп, сирек кездесетін "Сулоев созылуы" әдісімен жеңіске жетті.

Бұл әдіс - UFC тарихындағы ең сирек қолданылатын тәсілдердің бірі. Промоушен тарихында бұл әдіс бұған дейін небәрі 3 рет жасалған болса, Асу оны 4-ші болып орындады.

Киоджи Хоригути - ММА ардагері

Киоджи Хоригути - жапондық аралас жекпе-жек шебері, аса жеңіл және өте жеңіл салмақ дәрежелеріндегі ең тәжірибелі әрі атақты файтерлердің бірі. 1990 жылы 12 қазанда Такасакиде (Жапония) дүниеге келген. Кәсіби мансабын 2010 жылы бастаған.

UFC-дегі дебютін 2013 жылы жасап, тез арада титулға үміткер атанды. 2015 жылы чемпиондық белбеу үшін Деметриус Джонсонмен жұдырықтасып, тек бесінші раундта ғана есе жіберді. UFC-ден кеткеннен кейін Хоригути RIZIN және Bellator ұйымдарында сәтті өнер көрсетті: ол RIZIN-нің екі салмақтағы чемпионы және Bellator-дың өте жеңіл салмақтағы чемпионы атанды.

2025 жылы ардагер файтер UFC-ге оралып, жоғары деңгейде өнер көрсетуін жалғастырды. Хоригутидің стилі жылдамдыққа, соққы дәлдігіне және мықты күреске негізделген - бұл қасиеттер оған 15 жылдан астам уақыт бойы бәсекеге қабілетті болуға мүмкіндік берді.