Бокстан Әлем кубогының екінші күні қалай өтті?

22 сәуірге қараған түні Фос-ду-Игуасуда (Бразилия) Қазақстан құрамасының қатысуымен бокстан Әлем кубогы кезеңінің екінші күні өтті, - деп хабарлайды Tengri Sport.

Турнирдің екінші күнінде бірінші болып 55 келіге дейінгі салмақ дәрежесіндегі Бағлан Кенжебек шаршы алаңға шықты. Оның қарсыласы армян боксшысы Жирайр Саргсян болды.

Қазақстандық боксшы үшінші раундта қарсыласын нокдаунға түсіргенімен, бұл жеңіске жету үшін жеткіліксіз болды. Төрешілердің бөлек шешімімен жеңіс армян спортшысына бұйырды - 3:2.

Қазақстан құрамасынан келесі кезекте шаршы алаңға 65 келіге дейінгі салмақ дәрежесінде өнер көрсететін Мұхаммедсабыр Базарбайұлы көтерілді. Ол Тунис өкілі Хассен Атиамен жұдырықтасты.

Қазақстандық спортшы қарсыласын айқын басымдықпен жеңіп, төрешілердің бірауыздан шығарған шешімімен басым түсті. Осылайша, Мұхаммедсабыр Базарбайұлы турнирдің 1/8 финалына жолдама алды.

Еске сала кетейік, бокстан Әлем кубогының алғашқы кезеңі Фос-ду-Игуасуда (Бразилия) өтіп жатыр және ол 2026 жылдың 26 сәуіріне дейін жалғасады.

Қазіргі уақытта Қазақстан ұлттық құрамасы турнирдің екі күнінің қорытындысы бойынша 4 жеңіс пен 3 жеңіліске ие болды. Келесі кезеңге Назым Қызайбай, Фарух Тоқтасынов, Дәулет Молжігітов және Мұхаммедсабыр Базарбайұлы өтті.

Сондай-ақ, құрама қатысушыларының арасында Әлем кубогы кезеңінің медальдарын мерзімінен бұрын иеленген боксшылар бар екенін айта кетейік. Жеребе тастаудан кейін 80 келіден жоғары салмақ дәрежесінде өнер көрсететін қазақстандық Валерия Аксенова турнирдің финалына мерзімінен бұрын шықты.

Бұл оның Қазақстан қоржынына кем дегенде күміс медаль салатынына кепілдік береді.

80 келіге дейінгі дивизионда сынға түсетін тағы бір қазақстандық боксшы Жібек Жарасқызы да жеребенің сәтті болуымен турнирдің бірнеше кезеңінен мерзімінен бұрын өтті.

Қазақстандық спортшы өзінің алғашқы жекпе-жегін турнирдің жартылай финалында өткізеді, демек, ол қазірдің өзінде кем дегенде қола медальды қамтамасыз етіп тұр.