“Дивизионның басты қожайыны“: Шавкат Рахманов UFC-де маңызды қарсыластан шақырту алды

Майкл Моралес өзінің әлеуметтік желілерінде UFC-дің жартылай орта салмақтағы чемпионы Ислам Махачевке үндеу жасаған видео жариялады.

Ол онымен жұдырықтасуға дайын екенін, бірақ чемпионның титулдық кездесу алдында тағы бір үміткер – Карлос Пратеспен айқасуы керек деген сөзін құрметтейтінін айтты.

"Ислам, сен менің дивизионыма келіп, белбеуді алғалы бері мен сенімен жекпе-жек сұрап келемін. Менің кім екенімді білесің. Ал Пратес пен маған келсек, сен: "Олар өзара төбелесіп алсын" дедің. Жақсы, мен мұны құрметтеймін. Бірақ одан кейін ешқандай сылтау болмасын. Сен екеуміз белбеу үшін таласамыз. Пратес, сен UFC маған қарсы жекпе-жек ұсынбағанын айттың. Мені бірінші раундта нокаутқа түсіремін дедің. Тамаша, бауырым, солай жасайық. Сен де белбеуді қалайсың, мен де қалаймын – кімнің келесі екенін анықтайық", - деді Моралес.

Сондай-ақ Моралес егер UFC оның қатысуынсыз Пратес пен Махачев арасында жекпе-жек тағайындаса, 2027 жылға жоспарланған қарсыласы бар екенін мәлімдеді.

Эквадорлық спортшы келесі жылы Шавкат Рахмоновпен кездесу өткізетінін айтты.

"Бірақ егер сендердің басқа жоспарларың болса. Ислам, егер сен оңайырақ қарсылас қалағандықтан Пратесті таңдасаң, онда менің 2027 жылға жоспарланған айқасым бар. Бұл дивизионның басты қожайыны – Шавкат Рахмонов. Мені қайдан табуға болатынын білесің", - деп толықтырды ол.

Tengri Sport тілшісі Шавкат Рахмоновтың бапкері, қазақстандық маман Эдуард Базровқа хабарласты. Ол Моралес тарапынан жекпе-жек туралы әзірге ешқандай ұсыныс түспегенін айтты.

"Моралес көп нәрсе айтады, бірақ бәрі өзгеруі мүмкін. Қазіргі уақытта менде ондай ақпарат жоқ. Моралес жекпе-жек бойынша бізге хабарласқан емес. Жалпы, файтерлер танымалдылық үшін (хайп) мұндай сөздерді жиі айтады", - деді Эдуард Базров Tengri Sport-қа берген сұхбатында.

Сондай-ақ ол Моралестің айтарлықтай мықты қарсылас екенін, алайда бапкердің сөзінше, оның деңгейі "Номадқа" жете қоймайтынын атап өтті.

"Жеңіліп көрмеген, барлық аспектіде өте мықты спортшы. Оның өте үлкен салмақ қуатынын естідім. 103-104 келі тартады дейді. Бұл қаншалықты шындық екенін білмеймін. Бұған дейін ол Шон Брэдиді жеңген. Оның тізімінде өте мықты спортшылар бар, бірақ ол әлі Шавкат сияқтылармен кездескен жоқ. Тәжірибесінде мұндай деңгейдегі файтер болған емес. UFC сияқты ұйымда біреуді таңдау – үлкен қателік. Кімді береді, сонымен жұдырықтасу керек. Жаттығу жиынын өткізіп, барын салу қажет", - деп толықтырды жаттықтырушы.

Еске сала кетейік, бұған дейін Майкл Моралес Шавкат Рахмоновқа қарсы жекпе-жек туралы меңзеген болатын. Ол әлеуметтік желілерінде қазақстандықтың ирландиялық Иэн Гэрриге қарсы кездесуін қайта қарап отырған видеосын жариялаған.

Бір сәтте Моралес камераны қазақстандықтың тегіне жақындатып, содан кейін объективті қолын көтеріп тұрған өз бейнесіне бұрады.

Моралес – UFC рейтингіндегі жеңіліп көрмеген соңғы файтер

Айта кетейік, эквадорлық файтер UFC рейтингінің үздік 15 спортшысының арасында 19-0 рекордымен мінсіз нәтиже көрсетіп тұрған жалғыз өкіл. Дәл осындай көрсеткіш қазақстандық жұлдыз Шавкат Рахмоновта да бар.

Моралес соңғы рет октагонға 2025 жылдың 15 қарашасында Нью-Йорктегі (АҚШ) "Мэдисон-сквер-гарден" аренасында өткен UFC 322 турнирі аясында шықты. Онда ол тәжірибелі америкалық Шон Брэдимен кездескен болатын.

Жекпе-жек бірінші раундта-ақ мерзімінен бұрын аяқталды. Моралес алғашқы секундтардан-ақ басымдықты иеленіп, Брэдиге жойқын қысым мен дәл соққылар бағыттады. Раундтың ортасында ол қарсыласын қарымды соққылар сериясымен ұстап алып, нокаутқа түсірді.

Шавкат Рахмоновтың жекпе-жекке шықпағанына екі жылға жуықтады

Еске сала кетейік, жеңілмеген қазақстандық Шавкат Рахмонов 2024 жылдың 8 желтоқсанында өткен UFC 310 турнирінен бері жекпе-жекке шықпады. Ол кезде Шавкат төрешілердің бірізді шешімімен ирландиялық Иэн Гэрриді жеңген болатын.

Бастапқыда бұл жекпе-жек Шавкат үшін чемпиондық айқас болуы тиіс еді, бірақ сол кездегі белбеу иегері Белал Мухаммад жарақатына байланысты кездесуден бас тартты. Кейінірек Рахмоновтың өзі де жарақат алғанын мәлімдеп, чемпиондық атаққа таласа алмады.

Қазақстандық спортшы біраз уақыт бойы өнер көрсетпегендіктен, оны UFC рейтингінен шығарып тастады.

“Жай ғана хайп жинағысы келді“: шешен спортшысы Шавкат Рахмоновқа сес көрсетті