Джоковичтің сенсациясы және Бубликтің жеңісі: US Open турнирінің басты жаңалықтары

Фото: depositphotos.com/livephotosport// © Tengrinews.kz / Маржан Қуандықова

Әлемнің экс-бірінші ракеткасы және ATP титулдарының саны бойынша рекордшы, сербиялық Новак Джокович US Open турнирінің бірінші айналымында жеңіліс тапты. Қазақстанның бірінші ракеткасы Александр Бублик жарысты жалғастырады, деп хабарлайды Tengri Sport.

Алғашқы матчте 39 жастағы Джокович аргентиналық Мариано Навонемен кездесті. Аргентиналық теннисші бірінші сетте тай-брейкте жеңіске жеткенімен, кейін қатарынан екі партияда есе жіберді.

Ойынның үшінші сағаты аяқталар тұста тәжірибелі сербтің күш-қуаты сарқылғандай, ол соңғы екі сетте 6:2; 6:1 есебімен жол берді.

Джоковичтің матчі 4 сағат 40 минутқа созылды және бұл оның соңғы 20 жыл ішінде Үлкен дулыға турнирлерінің бастапқы матчіндегі алғашқы жеңілісі болды.

Бұдан бөлек, US Open турнирінен шығып қалуы Джоковичтің жарыс қорытындысы бойынша әлемдік рейтингтің үздік ондығынан (топ-10) шығатынын білдіреді.

Новак Джокович деген кім?

Еске сала кетейік, Новак Джокович бірнеше жыл бойы әлемдік рейтингтің көшін бастады. Ол 428 апта бойы планетаның бірінші ракеткасы атанып, рекорд орнатқан.

Сондай-ақ оның еншісінде Үлкен дулыға турнирлерінің рекордтық 24 титулы мен 2024 жылғы Олимпиада ойындарының алтыны бар.

Қазақстандықтар US Open турнирінде

Қазақстанның бірінші ракеткасы Александр Бублик турнир қорытындысы бойынша әлемдік рейтингте Джоковичтен озып, топ-10 қатарына қайта оралуы мүмкін. Бірінші раундта қазақстандық теннисші төрт сетте америкалық Джеффри Вулфты қапы қалдырды.

Еліміздің тағы бір өкілі - Александр Шевченко бірінші айналымда хорватиялық Дино Прижмичтен жеңіліп қалды. Бес сетке созылған тартысты матчте қазақстандықтың матчболы болғанымен, ол ойынды жеңіске дейін жеткізе алмады.

Әйелдер арасындағы жекелей сында Елена Рыбакина мен Юлия Путинцева US Open-дегі бақтарын сынауға дайындалып жатыр. Алдын ала мәлімет бойынша, олардың матчі ертең өтеді.