Жанкүйерлер PGL Astana қарсаңында киберспорт жұлдызын таптап кете жаздады

Фото: hltv.org ;Видеодан кадрлар

Falcons клубы сапында өнер көрсететін белгілі ресейлік киберспортшы Максим kyousuke Лукин Астанада жанкүйерлерден зардап шеге жаздады, деп хабарлайды Tengri Sport.

Киберспорттың әлемдік жұлдыздары PGL Astana 2026 турниріне қатысу үшін Астанаға келді. Олардың кейбірі қалада болған уақытта жағымсыз жағдайларға тап болды.

Әлеуметтік желілерде киберспортшылармен жүзбе-жүз кездесу үшін оларды қонақүй маңында торуылдаған жанкүйерлердің видеосы тарап жатыр.

Осы жағдайдан зардап шеге жаздағандардың бірі Falcons ойыншысы Максим kyousuke Лукин. Видеода оның есімін айғайлап, жанына жақын баруға тырысқан қалың топ арасынан күзетшілер көмегімен шыққаны көрінеді.

@wis_b1ra.tami Clips and full streams 👆 #Falcons #kyousuke #csgo #teamfalcons #cs2 #KYOUSUKE #falcons #kyousuke999 ♬ all the sadness i had while i missed you - Sgarz

Мұндай жағдайға Team Spirit клубының мүшесі Андрей tN1R Татаринович те тап болды. Жарияланған кадрлардан жанкүйерлердің оған ұмтылып, кептеліс пайда болғанын көруге болады.

@4quard0 twitch:4quard0#4quard0 #pgl #pglastana2026 #twitch ♬ түпнұсқа дыбыс - Тамерлан✅️

Жанкүйерлердің шамадан тыс ықыласына қатысты әлеуметтік желіде PARIVISION клубының қазақстандық жаттықтырушысы Дастан dastan Ақбаев пікір білдірді.

Ол видеода жанкүйерлер қарасынан шошығанын, мұның шектен шыққандық екенін айтып, оларды тарауға шақырды.

Еске сала кетейік, бұған дейін Астанаға қазақстандық ойыншы Данил molodoy Голубенконың командасы Furia келген болатын. Клубты әуежайда жанкүйерлер жылы қарсы алды.

Сондай-ақ біраз уақыттан кейін molodoy өзінің тәлімгері, команда капитаны Габриэль FalleN Толедомен бірге Астанадағы компьютерлік клубтардың біріне барды. FalleN-нің айтуынша, бұл сапар оған бұрынғы LAN-турнирлері кезеңін еске түсірген.

PGL Astana 2026 - елордада ірі турнир

PGL Astana 2026 турнирі 9 мамырда басталып, плей-офф кезеңі 15-17 мамыр аралығында "Барыс Аренада" өтетінін еске саламыз.

Турнирдің жалпы жүлде қоры 1,6 миллион доллар (743,3 миллион теңге). Оның 800 мың доллары (371,6 миллион теңге) ойыншыларға, ал қалған 800 мыңы ұйымдарға тиесілі. Жеңімпаз 256 мың доллар (119 миллион теңге), ал екінші орын алған команда 120 мың доллар (55,7 миллион теңге) иеленеді.

Турнирге әлемнің ең үздік 16 командасы қатысады. 12 ұжым Valve рейтингі бойынша тікелей шақырту алса, тағы төрт команда аймақтық іріктеу арқылы жолдама алды.

PGL Astana 2026 қатысушылары:

Team Falcons;
Team Spirit;
MOUZ;
G2 Esports;
FURIA;
Aurora;
PARIVISION;
The MongolZ;
HEROIC;
Monte;
Gentle Mates;
9z Team;
Fisher College;
The Huns Esports;
magic;
K27.

Топтық кезеңде 16 команданың барлығы швейцариялық жүйе бойынша ойнайды, онда жеңімпаздар жеңімпаздармен, ал жеңілгендер жеңілгендермен кездеседі. Бұл кезеңдегі әрбір матч екі жеңіске дейін жалғасады.

Ал плей-офф ойыннан шығып қалу (knock-out) форматында өтеді. Әр матчтан кейін бір команда жарыс жолынан шығып отырады.

Гранд-финал best-of-5 форматында өтеді, онда алғашқы болып жеңіске жеткен 3 команда ұтады.