Қазақстандық UFC файтері Бекзат Алмахан лигадан шығарылды

Қазақстандық спортшы Бекзат Алмаханның UFC ростерінен шығарылғаны белгілі болды. Оның 4 жекпе-жекке жоспарланған келісімшарты аяқталып, промоушеннің ресми сайтында оның мәртебесі "Уақытша шықпайды" деп өзгертілді.

Скриншот: ufc.ru

Бекзат Алмаханның UFC-дегі мансабы

Қазақстандық спортшы UFC-ге 11-1 (10 КО, ТКО) рекордымен ауысты. Оны алғашқы жекпе-жегінде-ақ үлкен сынақ күтіп тұрды. Ол дивизиондағы ең мықты жас файтерлердің бірі Умар Нурмагомедовпен кездесті.

Сол кезде ресейлік спортшы аса жеңіл салмақ рейтингінде 13-орында тұрған еді.

Бірінші раундтың басында қазақстандық басымдық танытты. Бір сәтте Бекзат Умарды жойқын соққымен нокдаунға түсірді.

Алайда кейінірек Умар ес жиып, өз айқас мәнеріне көшті. Нурмагомедов қазақстандықты партерге тартып, жердегі артықшылығын арттыра түсті. Нәтижесінде Алмахан алғашқы жекпе-жегінде төрешілердің бірауыздан шығарған шешімімен жеңілді.

Екінші кездесу араға бір жылдан аса уақыт салып өтті. Оның қарсыласы канадалық Брэд Катона болды. Жекпе-жек бірінші раундта-ақ мерзімінен бұрын аяқталды. Гонг соғылғаннан кейін 63 секунд өткенде Алмахан қарсыласына дәл соққы жұмсап, оны нокдаунға түсірді және соңына дейін соққы астына алды - төреші араласуға мәжбүр болды.

Үшінші жекпе-жекте оған тағы да мықты қарсылас тап болды. Октагонда қазақстандық спортшы UFC-дің сол кездегі жеңіл салмақтағы чемпионы Илия Топурияның ағасы - Александр Топуриямен кездесті.

Алмахан тамаша жекпе-жек өткізді. Ол нысанаға жиі тиіп, дәл комбинациялар жасады, алайда соққы қуатындағы айырмашылық анық байқалып тұрды. Кездесу толық уақытқа созылып, төрешілер жеңісті бірауыздан Топурияға берді.

Өзінің соңғы жекпе-жегінде Алмахан бразилиялық Жан Мацумотомен кездесті. Бұл бәсеке де тартысты өтті, бірақ қазақстандық спортшы төрешілерді жеңісіне сендіре алмады - олар жеңісті бірауыздан Мацумотоға берді.