Ламин Ямаль “Алтын допқа“ таласта жеңілгеннен кейін алғаш рет пікір білдірді

Фото: mrogowski_photography/depositphotos.com

"Барселона" мен Испания құрамасының вингері Ламин Ямаль "Алтын доп" сыйлығының қорытындысы туралы пікір білдірді. Әлемдегі ең қымбат ойыншылардың бірі өз уақыты әлі келетініне сенімді, деп хабарлайды Tengri Sport.

19 жастағы Ямаль қазіргі футболдағы басты жеке марапат үшін дауыс беруде тек Килиан Мбаппе мен жеңімпаз Харри Кейнге жол беріп, үшінші орынға ие болды. Сонымен қатар ол қатарынан үшінші рет әлемнің үздік жас ойыншысы жүлдесін иеленді.

"Жақсы нәрселер уақытты талап етеді, мен өз таңдаған жолыма сенемін. Асықпай, асқан толқыныспен және сабырмен өз уақытымды күтемін.
Жеңімпаздарды құттықтаймын, менің басты мақсатым - "Барселонаның" қайтадан жеңіс жолына түсуі", - деді Ямаль салтанатты рәсімнен бір күн өткеннен кейін.

Еске сала кетейік, 2025-2026 жылғы маусымның қорытындысы бойынша ағылшын футболшысы Харри Кейн үздік деп танылды. Ол тек Германия чемпионатын жеңіп алса да, Ямаль "Барселонамен" бірге Испания чемпионатын және Испания құрамасымен әлем чемпионатын ұтып алған болатын.

Дегенмен, Ямаль жеке статистика бойынша бәсекелесінен айтарлықтай қалып қойды. Кейн 73 гол соғып, 8 нәтижелі пас берсе, Ямальдың еншісінде 26 гол мен 21 ассист бар.

"Алтын доп" деген не және жеңімпаздарды кім анықтайды?

"Алтын доп" - қазіргі футболдағы ең басты жеке марапат. Оны 70 жыл бойы France Football журналы футболшылардың, жаттықтырушылар мен журналистердің дауыс беру қорытындысы бойынша тапсырып келеді.

Бастапқыда ол тек еуропалық үздік футболшыға берілетін, бірақ 1995 жылдан бастап барлық елдің ойыншысы үміткер бола бастады.

2022 жылға дейін ФИФА құрамына кіретін әрбір федерацияның дауыс беру құқығы болса, 2022 жылдан бастап тек әлемдік рейтингтегі үздік 100 елдің өкілдері ғана дауыс бере алады. Осылайша, Қазақстан жеңімпазды таңдау құқығынан айырылды, өйткені біздің құрама 117-орында тұр.

2026 жылы әр номинация бойынша жеңімпаздарды 100 түрлі елден келген 100 журналист анықтады.

Ресми: Харри Кейн 2026 жылғы "Алтын доп" иегері атанды

Бұған дейін ағылшын Харри Кейн өзін қазіргі уақытта әлемнің үздік футболшысы деп атады.

"Алтын допқа" таласқан тағы бір үміткер Килиан Мбаппе Мао Цзэдунға қатысты мемнен кейін басы дауға қалды.

Сонымен қатар Англияның қазіргі чемпионы - лондондық "Арсенал" күтпеген жерден төртінші дивизион командасынан жеңіліп, Англия лигасының кубогінен шығып қалды.