Михаил Кукушкин мансабын аяқтайды: ол Australian Open жартылай финалында ойнаған

Қазақстандық теннисші Михаил Кукушкин 38 жасында спорттық мансабын аяқтайтынын мәлімдеді, деп хабарлайды Tengri Sport теннисшінің әлеуметтік желідегі парақшасына сілтеме жасап.

Қазақстан құрамасы ардагерлерінің бірі үшін қазанда Алматыда өтетін ATP 250 сериясындағы турнир соңғы жарыс болмақ.

"Кейде тоқтап, артқа қарап, "Рақмет" айтатын сәт туады. Бүгін мен сіздермен қиын шешімімді бөліскім келеді. Кәсіби теннистегі көптеген жылдан кейін мен биыл спорттық жолымды аяқтаймын.

Менің соңғы турнирім қазанда Almaty Open ATP 250 аясында өтеді. Шынымды айтсам, қажетті сөз табу қиын болып тұр. Теннис мен үшін жұмыс немесе спорт қана емес, ол менің бүкіл өмірім болды. Бала кезімнен ол мені армандауға, күресуге, жеңіліске төзуге, жеңісті бағалауға және ешқашан берілмеуге үйретті", - делінген Кукушкиннің мәлімдемесінде.

Азиада чемпионы және Үлкен дулыға турнирінің жартылай финалисі

Михаил Кукушкин кәсіби теннистегі жолын 2007 жылы бастаған. Ол Қазақстан құрамасы сапында Азия ойындарында да, Дэвис Кубогы аясында да көптеген матч өткізді.

2014 жылы Кукушкин Александр Недовесов және Андрей Голубевпен бірге командалық жарыста Азиада алтынын жеңіп алды.

Кәсіби турда Михаил үшін ең жақсы нәтиже 2020 жылғы Australian Open турнирінде Александр Бубликпен жұптасып өнер көрсеткендегі жартылай финал болды.

Сондай-ақ Михаилдың еншісінде жекелей сында ATP 250 турниріндегі бір жеңіс пен челленджерлердегі 16 жеңіс бар.

Тағы оқыңыз: Рыбакина сенсациялық жеңілістен кейін әлемдік рейтингте Соболенкоға жақындады

“Тым жеңіл спорт түрі“: қазақстандық жас теннис жұлдыздары туралы не белгілі?