Рыбакина өткен турнирдегі жарақатынан кейін US Open-ге келді

Фото © Tengrinews.kz / Тұрар Қазанғапов

Қазақстандық теннисші, әлемнің екінші ракеткасы Елена Рыбакина Нью-Йоркке (АҚШ) ұшып келіп, US Open турнирінің алдында автограф-сессия өткізді. Оның жарысқа қатысу-қатыспауы әлі де белгісіз, деп хабарлайды Tengri Sport спортшының әлеуметтік желілеріне сілтеме жасап.

Қазақстанның үздік теннисшісі Instagram парақшасында Нью-Йорктен фото, кейін автограф таратып жатқан видеосын жариялады. Осылайша, Рыбакина биылғы маусымдағы соңғы Үлкен дулыға турнирі өтетін жерге келгенін растады.

Айта кетейік, қазақстандық спортшы Цинциннатидегі соңғы турнирді 1/4 финал кезеңінде аяқтаған болатын. Елена жарақатына байланысты польшалық Ига Швёнтекпен болған матчті соңына дейін өткізе алмады.

Кездесуден кейін спортшы " маған жүру ауыр тиіп тұр" деп ағынан жарылды және жарақаттың мән-жайын тек МРТ тексерісінен өткен соң ғана білетінін айтты.

Бұдан кейін US Open ұйымдастырушылары Елена Рыбакинаның америкалық Тейлор Фрицпен бірге өнер көрсетуді жоспарлаған аралас жұптық бәсекеден бас тартқанын хабарлады.

Қазақстандықтың жекелей сынға қатысатыны немесе жарыстан шығатыны туралы ресми мәлімдеме әзірге жасалған жоқ.

Фото: instagram.com/lenarybakina/

Неге US Open додасына қатысу Рыбакина үшін тарихи оқиға болуы мүмкін

Айта кетейік, осы Үлкен дулыға турнирінің қорытындысы бойынша қазақстандық теннисші мансабында алғаш рет әлемдік рейтингте көш бастауы мүмкін. Ол үшін оған жартылай финалға дейін жету қажет.

Сонымен қатар Рыбакина турнирге қатыспаған жағдайдың өзінде әлемнің бірінші ракеткасы атануы мүмкін бір нұсқа бар. Ол үшін мына үштіктің ешқайсысы жеңімпаз болмауы тиіс: Арина Соболенко (Беларусь), Коко Гауфф, Джессика Пегула (АҚШ).

Еске сала кетейік, Соболенко турнирдің кейінгі екі маусымында жеңіске жетсе, Гауфф 2023 жылғы жеңімпаз атанған болатын.

Ал Рыбакинаға келетін болсақ, қазақстандық спортшының бұл турнирдегі ең үздік нәтижесі - өткен маусымдағы 4-ші раундқа шығуы.