Рыбакина сенсациялық жеңілістен кейін әлемдік рейтингте Соболенкоға жақындады

Қазақстандық теннисші Елена Рыбакина WTA әлемдік рейтингіндегі екінші орнын сақтап қалды және "Ролан Гарростан" кейін әлемнің бірінші ракеткасы мәртебесіне жақындай түсті, деп хабарлайды Tengri Sport.

Әйелдер теннисі қауымдастығы (WTA) әлемдік рейтингтің жаңа нұсқасын жариялады. Франция ашық чемпионатының 1/4 финалында жеңіліс тапқанына қарамастан, Беларусь елінің өкілі Арина Соболенко бірінші орынды сақтап қалған.

Қазақстандық теннисші Елена Рыбакина турнир жолынан ертерек шығып қалған болатын - ол екінші айналымда украиналық Юлия Стародубцевадан күтпеген жерден жеңіліп қалды.

Соған қарамастан, Рыбакина мен Соболенконың арасындағы ұпай айырмашылығы азайды. Өткен аптада қазақстандық спортшы 1347 ұпайға қалып қойса, қазір бұл көрсеткіш 947 ұпайды құрайды.

WTA әлемдік рейтингінің көшбасшылары

• Арина Соболенко (Беларусь) - 9090;
• Елена Рыбакина (Қазақстан) - 8143;
• Ига Швёнтек (Польша) - 6733;
• Джессика Пегула (АҚШ) - 6056;
• Аманда Анисимова (АҚШ) - 5848;
• Мирра Андреева (Ресей) - 5751;
• Коко Гауфф (АҚШ) - 4879;
• Элина Свитолина (Украина) - 4315;
• Виктория Мбоко (Канада) - 3670;
• Каролина Мухова (Чехия) - 3438.

WTA рейтингі қалай есептеледі?

Естеріңізге сала кетейік, теннистің әлемдік рейтингі спортшының осы маусымдағы жетістігін ғана емес, сонымен қатар оның нәтижелері өткен жылмен салыстырғанда қаншалықты жақсарғанын да көрсетеді.

Өткен жылы "Ролан Гарроста" Елена Рыбакина төртінші айналымға дейін жетсе, Арина Соболенко финалда ойнаған болатын. Биылғы "Ролан Гаррос" қорытындысы бойынша екеуі де нәтижелерінің төмендеуіне байланысты ұпай жоғалтты, бірақ Соболенко көбірек ұпайынан айырылды, бұл Рыбакинаға қарсыласына жақындауға мүмкіндік берді.

Рыбакина қашан әлемнің бірінші ракеткасы бола алады?

Маусымдағы басты шөптегі турнир - Лондондағы (Ұлыбритания) Уимблдон басталғанға дейін Рыбакина бірінші орынға көтеріле алмайды, бірақ бәсекелесіне жақындай түсуі мүмкін. Қазір Еленің алдында Queen’s Club Championships - деңгейі төмендеу тағы бір лондондық турнир тұр, мұнда ол өткен жылғы жартылай финалдағы нәтижесін қорғауы керек, ал Арина бұл жарысқа қатыспайды.

Бұдан кейін екі теннисші де Берлиндегі шөптегі турнирге қатысады. Онда Рыбакина бір жыл бұрын екінші айналымда ұтылса, Арина 1/2 финалға дейін жеткен еді.

Уимблдон басталғанға дейін қазақстандық теннисші Соболенкомен арадағы айырмашылықты 500 ұпайдан да азайта алады.

Өткен Уимблдонда Рыбакина тек үш айналымнан өтсе, Соболенко тағы да жартылай финалда ойнады. Осылайша, қазақстандық спортшыға қорғайтын ұпай аз, бұл оған шөп маусымының соңында-ақ бірінші орынға шығуға мүмкіндік береді.

Елена Рыбакина мен Арина Соболенконың қарым-қатынасы

Елена мен Аринаның текетіресі қазіргі теннис әлеміндегі классикаға айналып үлгерді. Осы уақытқа дейін олар 17 рет кездескен, жеке кездесулер есебі 10:7 көрсеткішімен Беларусь өкілінің пайдасында.

Биыл Рыбакина басты қарсыласын Australian Open финалында жеңгенімен, кейінгі екі ойында жол беріп қойды.

Теннисшілердің мінез-құлқында үлкен айырмашылық бар: әдетте қарапайым Елена әлемдегі ең эпатажды спортшылардың бірімен бетпе-бет келді.

Елена Аринаны алғаш рет 2023 жылы Индиан-Уэллсте жеңді, сол кезде Соболенко марапаттау рәсімінде нағыз шоу жасады. Қазақстандық теннисші қарсыласына финал үшін құрмет білдіріп жатқанда, ол кенеттен тілін шығарып, трибунадағы жанкүйерлерді күлдірді.

2025 жылдың соңында өткен WTA Қорытынды турнирінің финалындағы кездесу кезінде Соболенконың жүйкесі сыр берді. Рыбакина кезекті сәтті соққысын жасағаннан кейін, Арина өз командасына "жылына бір рет таяқ та атады" деп айқайлаған.

Tengri Sport-қа берген сұхбатында қазақстандық теннисші бұл сөз оған бағытталса да, қарсыласына реніші жоқ екенін айтты.

"Маған матчтан кейін жіберген болатын... Біз Аринамен көп рет ойнадық, биыл да бір емес, бірнеше рет кездестік, сондықтан мен бұған аса көңіл бөлмеймін. Мен Аринаға да, оның командасына да жақсы қараймын, сондықтан бұл шынымен маған қарата айтылса да, көңіліме алмаймын", - деді Рыбакина.

Айта кетейік, сабырлы жағдайда Соболенко Рыбакинаны "ғаламат теннисші" деп атап, оның добын ойынға қосу шеберлігін жоғары бағалап, талай рет құрмет білдірген.

Елена да қарсыласына жиі құрмет көрсетеді, тіпті қазіргі уақытта оны өзінен де мықты деп санайды.

"Арина соңғы екі маусымда өте жақсы нәтижелер көрсетіп жүр. Ига (Швёнтек - ред.) мен Арина — менің қарсыластарым екені түсінікті, бірақ жалпы алғанда, олардың қол жеткізген нәтижелері өте тамаша", - деп атап өтті Рыбакина сол сұхбатында.