Шымкенттік бапкер матч кезінде қызды ұрып жіберген: қандай жаза қолданылғаны белгілі болды

Бейнеден кадрлар

Павлодарда жекеменшік клубтар арасындағы волейболдан Қазақстан біріншілігі кезінде Шымкент волейбол академиясы командасының тәлімгері өз тәрбиеленушісін ұрып жіберді. Енді ол бір жыл бойы жарыстарға қатыса алмайды, деп хабарлайды Tengri Sport волейбол федерациясының баспасөз қызметіне сілтеме жасап.

Әлеуметтік желілерде тараған видеоға қарағанда, оқиға 26 қазанда болған. Бейнежазбадан жаттықтырушының өз командасындағы 9-нөмірлі либероны алаң шетіне шақырып алып, басынан ұрғанын көруге болады.

Айта кетейік, Павлодардағы турнирде 2012–2013 жылы туған қыздар өнер көрсетіп жатыр.

Қазақстан волейбол федерациясы Tengri Sport сауалына берген жауабында оқиға болғанын растап, жаттықтырушы жазаланғанын хабарлады.

"Балаға күш қолдану дерегіне қатысты оқиға бойынша федерация шешімімен жаттықтырушы бір жылға шеттетілді. Оған федерация аясында өтетін барлық турнир мен жарыстарда жаттықтырушы, оқытушы болып жұмыс істеуге қатаң тыйым салынады.
Осы біріншілікті өткізген ұйым да бұл жаттықтырушыны толық шеттетті, жеке академия да дәл осындай шара қолданды", - деді Қазақстан ұлттық волейбол федерациясының бас хатшысы Мейірбек Нұгұспанов.

Айта кетейік, видеода ойыншы мен жаттықтырушы арасындағы жанжалға не себеп болғаны және оқиға қалай аяқталғаны көрінбейді.

Tengri Sport редакциясы Шымкенттің дене шынықтыру және спорт басқармасына сауал жолдады.

Еске сала кетейік, осыдан алты жыл бұрын Маңғыстау облысындағы волейбол жаттықтырушысына қатысты осындай жағдай дау тудырған болатын. Ол кезде әлеуметтік желіде жаттықтырушы өз тәрбиеленушілерін бетінен ұрғаны туралы видео тараған.

Ол кезде маман мектептегі жұмыстан шығарылды. Жаттықтырушының өзі бейнеүндеу жариялап, болған жайтқа қатысты өз нұсқасын айтқан болатын.