UFC басшысы ұйымның нақты құнын атады

Фото © Tengrinews.kz / Тұрар Қазанғапов

UFC басшысы Дана Уайт компанияның қазіргі нақты құны қанша екенін айтты, - деп хабарлайды Tengri Sport.

Аралас жекпе-жектің ең танымал промоушенінің президенті әрі бас директоры Дана Уайт The Diary of a CEO YouTube-арнасына берген сұхбатында әлемдегі үздік ММА ұйымының құны бүгінде шамамен 50 миллиард долларға бағаланатынын мәлімдеді.

"Мен бұл бизнесті бастаған кезде көп адам оның болашағына сенбеді. Сондықтан біз UFC-ді 2 миллионға сатып алдық. Ашығын айтайық, UFC 2 миллион долларға (913 миллион теңге) сатып алынды. Егер "Лейкерс" 12,5 миллиард долларға (5,7 триллион теңге) сатылса, онда UFC 50 миллиард доллар (22,8 триллион теңге) тұрады", - деді Дана Уайт.

UFC қалай пайда болды?

Ultimate Fighting Championship (UFC) 1993 жылы 12 қарашада құрылды. Салмақ дәрежесі жоқ және ережесі өте аз турнир өткізу идеясын бразилиялық джиу-джитсу шебері Рорион Грейси мен бизнесмен Арт Дэви Semaphore Entertainment Group (SEG) компаниясының қолдауымен ұсынды.

Алғашқы UFC 1 турнирі Денверде (Колорадо штаты, АҚШ) өтті. Бастапқыда жекпе-жектер "ережесіз шайқас" ретінде таныстырылды, бұл АҚШ-тың бірқатар штатында қатаң сын мен тыйым салуға себеп болды.

ММА-дағы үздік промоушен 2 миллион долларға сатылған

1990-жылдардың аяғына қарай промоушен банкроттық алдында тұрды: реттеу мәселелері, ақылы трансляциялардың (pay-per-view) аз сатылуы және жағымсыз имидж кедергі болды. 2001 жылдың қаңтарында ағайынды Фрэнк пен Лоренцо Фертитта (Station Casinos казинолар желісінің иелері) өздері құрған Zuffa компаниясы арқылы UFC-ді SEG-тен небәрі 2 миллион долларға (913 миллион теңге) сатып алды. Дана Уайт ұйымның президенті болып тағайындалып, оған шағын үлес берілді.

Олардың басшылығымен UFC түбегейлі өзгерді: салмақ дәрежелері, бірыңғай ережелер, медициналық бақылау және антидопинг бағдарламасы енгізілді. 2005 жылы The Ultimate Fighter (TUF) реалити-шоуының іске қосылуы шешуші сәт болды, бұл жоба аралас жекпе-жекті кең танымалдыққа ие етті.

Уақыт өте келе UFC бәсекелестерін (PRIDE, WEC, Strikeforce) жұтып, АҚШ-тың барлық штатында ММА-ды заңдастырды және жаһандық брендке айналды.

2016 жылдың шілдесінде Zuffa компаниясы UFC-ді WME-IMG (кейінірек Endeavor) бастаған инвесторлар тобына шамамен 4 миллиард долларға (1,8 триллион теңге) сатты. Уайт президенттік қызметін және жаңа құрылымдағы үлесін сақтап қалды. 2023 жылы UFC WWE-мен бірігіп, TKO Group Holdings жария компаниясының құрамына енді, ал Уайт UFC-дің бас директоры болды.

UFC құнына 250 "Астана Арена" стадионын салуға болады

Қазіргі уақытта Дана Уайт компанияның құнын 50 миллиард долларға бағалап отыр. UFC басшысы айтқан соманың ауқымын түсіну үшін: Қазақстанның басты футбол стадионы - "Астана Аренаның" құрылысына шамамен 200 миллион доллар жұмсалды. Демек, UFC-ді сатудан түскен сомаға Қазақстанда 250 осындай стадион салуға болар еді.

“Дивизионның басты боссы“: Шавкат Рахмонов UFC-де айбынды үндеу қабылдады