Алмабаевтың салмағындағы UFC-дің 34 жастағы файтері жүрек талмасынан қайтыс болды

UFC баспасөз қызметі әлеуметтік желілердегі парақшаларында 34 жастағы қазіргі спортшы Аллан Насиментоның өз үйінде ес-түссіз табылғаны туралы ақпарат жариялады.

Оқиға орнына келген дәрігерлер спортшының қаза болғанын тіркеді. Алдын ала мәлімет бойынша, бразилиялық файтер ұйықтап жатқанда жүрек талмасынан қайтыс болған.

UFC ұйымы Аллан Насциментоның жақындары мен туыстарына көңіл айтты.

"Біздің аса жеңіл салмақтағы сүйікті файтеріміз Аллан Насименто ұйқы кезінде, алдын ала болжам бойынша, жүрек талмасынан кейін ес-түссіз күйінде табылды. Оқиға орнына келген медициналық бригаданың күш-жігеріне қарамастан, оның қайтыс болғаны анықталды. Осынау ауыр сәтте Алланның отбасына, достарына, командаластарына және жақындарына қайғырып көңіл айтамыз", - деп жазды UFC баспасөз қызметі.

Аллан Насименто деген кім?

Аллан Насименто - аралас жекпе-жектің бразилиялық шебері. Ол 1991 жылы 11 қыркүйекте Сан-Паулуда (Бразилия) дүниеге келген. Тым арық болғандықтан, жасөспірім кезінде оған "Puro Osso" ("Қу сүйек") деген лақап ат қойылған.

Жаттығуды муай-тайдан бастап, кейін аралас жекпе-жекке ауысты. Спорттық мансабын толығымен Бразилиядағы ең мықты ұжымдардың бірі - әйгілі Chute Boxe Diego Lima командасында өткізді.

Ол жерде тек файтер ғана емес, сенімді спарринг-серіктес те болды. Командаластарына, соның ішінде өзімен өте жақын дос болған UFC-дің жеңіл салмақтағы бұрынғы чемпионы және қазіргі BMF белбеуінің иегері Чарльз Оливейраға жекпе-жек кезінде жиі секундтант болды.

Насиментоның кәсіпқой дебюті 2011 жылы өтті. 15 жылға жуық уақыт ішінде ол 29 жекпе-жек өткізіп, 22 жеңіске жетіп, 7 рет жеңілген. Жеңістерінің басым бөлігін мерзімінен бұрын аяқтаған (16 рет қылқындыру немесе ауырту әдісімен). 2018 жылы Dana White’s Contender Series турнирінде өнер көрсетіп, Раулиан Пайвеге төрешілердің бөлек шешімімен есе жіберсе де, UFC-ге жолын жалғастырған.

2021 жылдың қазан айында Насименто әлемнің басты ұйымындағы дебютін UFC 267 турнирінде Тагир Уланбековке қарсы өткізіп, төрешілердің бөлек шешімімен жеңілді.

Бұдан кейін төрт жеңісті серия басталды: Джейк Хэдли (төрешілердің бірауыздан шығарған шешімі), Карлос Эрнандес (бірінші раундта арттан қылқындыру, кештің үздік өнері), Жафел Фильо (төрешілердің бірауыздан шығарған шешімі) және Коди Дёрден (екінші раундта "анаконда" әдісі, кештің үздік өнері).

Соңғы жекпе-жегін 2026 жылы 20 маусымда UFC Fight Night турнирінде Митч Рапозоға қарсы өткізіп, төрешілердің шешімімен жеңіліс тапқан, осылайша жеңісті сериясы үзілді. Нәтижесінде оның UFC-дегі рекорды 4-2 болды.

Насименто дивизиондағы ең мықты грэпплерлердің бірі саналды және үнемі ТОП-15 тізіміне жақын жүрді. Ол жиырма жылға жуық уақыт бойы бір жаттығу залы мен бір бапкерге - Диего Лимеге адал болған, бұл қазіргі MMA әлемінде сирек кездесетін жайт.

Айта кетейік, Насименто аса жеңіл салмақта өнер көрсеткен. Осы салмақ дәрежесінде қазақстандық файтер, еліміздің UFC-дегі үздік өкілі Асу Алмабаев та жекпе-жектерін өткізеді.

Бразилияда матч кезінде атыс болып, 15 жастағы футболшы қаза тапты