Хабиб Нурмагомедов UFC басшысын өтірік айтты деп айыптады

UFC-дің танымал экс-чемпионы, ММА тарихындағы ең үздік файтерлердің бірі Хабиб Нурмагомедов өзінің кәсіби мансабын аяқтау себептері туралы пікір білдірді, деп хабарлайды Tengri Sport.

Хабиб Нурмагомедов өзінің әлеуметтік желілерінде UFC басшысы Дана Уайттың оның мансабын аяқтау себептері туралы айтқан сөздеріне наразылық білдірді.

Оның жазуынша, промоушен басшысы Хабибті көп ақша тапқандықтан мансабын аяқтады деп айтқан, алайда Нурмагомедов бұл сөздерде шындық жоқ екенін мәлімдеді.

"Интернетте кейде тақырыптарды оқып қаламын, әрине, мен желідегі әрбір қоқысқа пікір білдіруге әуес емеспін, бірақ Дана осындай нәрселерді айтқанда, ол жер-жерге тарайды. Мен былай айтайын: бұл - мүлдем өтірік, маған ешкім ешқашан ондай миллиондарды берген емес, сондай-ақ спортты көп ақша тапқандықтан тастады деп жазылғандар да шындық емес. Нағыз шындықты бүкіл әлем біледі - бұл туралы бірнеше рет айтқанмын, қайталаудың қажеті жоқ", - деп жазды Нурмагомедов.

Скриншот: instagram.com/khabib_nurmagomedov

Хабиб Нурмагомедов - спорт тарихындағы ең ұлы аралас жекпе-жек шеберлерінің бірі.

Ол 2018 жылдың сәуірінде UFC 223 турнирінде америкалық Эл Яквинтаны жеңіп, UFC чемпионы атанды.

Одан кейін ол Конор Макгрегор, Дастин Порье және Джастин Гейтжиге қарсы 3 сәтті қорғау жекпе-жегін өткізді. Содан соң мансабын аяқтап, жеңілмей кетті.

Бұған оның әкесі - Абдулманап Нурмагомедовтің қайтыс болуы себеп болды. Файтер әкесі дүниеден өткен соң өнер көрсетудің мәнін көрмейтінін және жақындарымен мүмкіндігінше көбірек уақыт өткізгісі келетінін түсіндірді.