Испанияда пойыздар соқтығысты: Король кубогінің 24 матчі кейінге шегерілді

Испаниядағы теміржол апаты. Видеодан кадрлар

Испания футбол федерациясы (RFEF) Толедодағы кем дегенде 50 адамның өмірін қиған апатқа байланысты Король кубогінің барлық матчтерін белгісіз мерзімге шегеретінін мәлімдеді, деп хабарлайды Tengri Sport ұйымның баспасөз қызметіне сілтеме сілтеме жасап.

28 қазанда бірінші раундтың 24 кездесуі, соның ішінде Ла Лига командаларының қатысуымен өтуі тиіс еді. Алайда RFEF жоспарланған барлық ойынды кейінге қалдыру туралы шешім қабылдады.

"Сәрсенбі таңертең Толедо провинциясында болған қайғылы теміржол апатының құрбандарына құрмет пен ортақтастық белгісі ретінде Испания корольдік футбол федерациясы (RFEF) бүгін түстен кейін және кешке жоспарланған Испания кубогі (Король кубогі) бірінші турының барлық 24 матчін тоқтатты. RFEF алдағы күндері турнирдің қайта қаралған кестесі мен кейінге қалдырылған матчтердің уақытын жариялайды. Испания футбол қауымдастығы қайғыға ортақ және осы сұмдық оқиғаның құрбандарына көмек көрсетуде билікке қолдау білдіреді", - делінген RFEF сайтындағы мәлімдемеде.

Испанияда не болды?

28 қазанда таңертең екі жолаушылар пойызы соқтығысты. Алдын ала мәліметтер бойынша, Толедо маңында Renfe мемлекеттік компаниясының AVE пойызы мен Iryo жеке тасымалдаушысының құрамы соқтығысқан.

Бастапқыда 10 адам қаза тапқаны хабарланып, кейін құрбандар саны 50-ге дейін өсті. Екі пойызда 544 адам болған: оның 397-сі AVE құрамында, тағы 147-сі Iryo пойызында.

Бұл Испанияның жүйрік теміржол желілеріндегі екінші ірі апат. Қаңтарда Кордова провинциясындағы Адамус маңында Iryo пойызы рельстен шығып кетіп, Renfe құрамымен соқтығысқанда 40-тан аса адам қаза тапқан.