“Қазір әлемдегі ең үздік ойыншымын“ - Харри Кейн мансабындағы алғашқы “Алтын доп“ туралы

33 жастағы форвард өз мансабында алғаш рет Лондонда өткен салтанатты іс-шарада әлемнің үздік ойыншысы марапатын иеленді. "Алтын допқа" таласта ол "Реал" сапындағы Килиан Мбаппе мен "Барселона" ойыншысы Ламин Ямальды басып озды.

"Ғажап, ерекше сезімдемін! Лондондағы ұмытылмас кеш. Барлық жеңімпазды құттықтаймын. Барша достарыма, отбасыма, командаластарыма, бапкерлер штабына және бүкіл әлемдегі жанкүйерге алғыс айтамын. Сіздерсіз бұған қол жеткізу мүмкін болмас еді. Иә, қазір мен әлемдегі ең үздік ойыншымын. Бұл керемет сезім. Үлкен рақмет!", - деп жазды Кейн марапатты алған бойда өзінің әлеуметтік желілерінде.

Айта кетейік, Харри Кейн 2001 жылғы Майкл Оуэннен кейін "Алтын допты" иеленген алғашқы ағылшын футболшысы атанды.

Кейн жүлде үшін таласта кімдерді басып озды?

Еске сала кетейік, әлемдік БАҚ мәліметтері бойынша, 2026 жылғы "Алтын допқа" басты үміткерлер Харри Кейн мен Ламин Ямаль болған еді, бірақ сарапшылардың бәрі бірдей ағылшын спортшысына басымдық бере қоймаған болатын.

Дегенмен, France Football журналы жариялаған дауыс беру нәтижесінде екінші орынға "Реал" мен Франция құрамасының шабуылшысы Килиан Мбаппе жайғасты.

Бұл ретте Ямаль биыл әлем чемпионаты мен Испания біріншілігінде жеңіске жетсе, Кейн "Бавариямен" бірге Бундеслиганы ұтып алды, ал Мбаппеде бірде-бір командалық трофей жоқ.

Британдық форвард Харри Кейн "Бавария" мен Англия құрамасы сапында феноменальды маусым өткізді. 73 гол және 8 нәтижелі пас – мұндай нәтижені тіпті Криштиану Роналду да көрсетпеген, ал Мессидің рекордтық көрсеткішіне небәрі 9 гол жетпей қалды.

"Алтын доп" дегеніміз не?

"Алтын доп" - қазіргі футболдағы ең басты жеке марапат. Оны 70 жыл бойы France Football журналы футболшылардың, жаттықтырушылар мен журналистердің дауыс беру қорытындысы бойынша тапсырып келеді.

Бастапқыда ол тек еуропалық үздік футболшыға берілетін, бірақ 1995 жылдан бастап барлық елдің ойыншылары үміткер бола бастады.

2022 жылға дейін ФИФА құрамына кіретін әрбір федерацияның дауыс беру құқығы болса, 2022 жылдан бастап тек әлемдік рейтингтегі үздік 100 елдің өкілдері ғана дауыс бере алады. Осылайша, Қазақстан жеңімпазды таңдау құқығынан айырылды, өйткені біздің құрама 117-орында тұр.

Ресми: Харри Кейн 2026 жылғы "Алтын доп" иегері атанды