Шавкат Рахмоновқа үндеу тастаған спортшы UFC-дің басты жекпе-жегінде жеңілді

Жекпе-жек екінші раундта аяқталды. Мэлотт қарсыласының иегінен тізесімен дәл соғып, оны октагон төсеміне құлатты. Канадалық файтер шабуылын жалғастыруға тырысқанымен, төреші араласып, кездесуді тоқтатты.

Бұл Мэлоттың кәсіби мансабындағы 15-ші жеңісі болды. Сондай-ақ, оның еншісінде екі жеңіліс пен бір тең ойын бар. Бакли 21 жеңіске ие болып, тоғызыншы рет жеңілді.

Кездесу алдында америкалық UFC-дің жартылай орта салмақ рейтингінде сегізінші орында тұрса, оның қарсыласы 11-ші сатыға жайғасқан болатын. Бұл салмақ дәрежесінің чемпионы – Ислам Махачев. Айта кетейік, осы дивизионда Шавкат Рахмонов та өнер көрсетеді.

"Қара бала, таяқ жейсің": Бакли Рахмоновты жекпе-жекке шақырған еді

2025 жылғы желтоқсанда америкалық файтер әлеуметтік желісінде даулы мәлімдеме жасаған еді. Оның айтуынша, Рахмонов айқастан қашып жүр, ал Шавкаттың командасы ықтимал қарсыластардың арасында оның есімін атамайды.

Қазақстандық спортшы бұл шақыруға ұзақ жауап іздемей, "Қара бала, таяқ жейсің" деп жауап қайтарған.

Скриншот: instagram.com/newmansa94/

Шавкат Рахмоновтың жекпе-жекке шықпағанына екі жылға жуықтады

Еске салайық, қазақстандық Шавкат Рахмонов 2024 жылғы 8 желтоқсанда өткен UFC 310 турнирінен бері жекпе-жекке шықпады. Ол кезде Шавкат төрешілердің бірізді шешімімен ирландиялық Иэн Гэрриді жеңген болатын.

Бастапқыда бұл жекпе-жек Шавкат үшін чемпиондық айқас болуға тиіс еді, бірақ сол кездегі белбеу иегері Белал Мухаммад жарақатына байланысты кездесуден бас тартты. Кейінірек Рахмоновтың өзі де жарақат алғанын мәлімдеп, чемпиондық атаққа таласа алмады.