38 жылдағы алғашқы титул: әлем чемпионы әжесіне берген уәдесін орындады

Германия құрамасы сапында футболдан әлем чемпионы атанған Лукас Подольски 40 жасында туған қаласының клубына Польша Кубогын жеңіп алуға көмектесті. Бұл титул клуб үшін соңғы 38 жылдағы алғашқы жүлде болды, - деп хабарлайды Tengri Sport.

Польшаның шағын ғана Забже қаласының "Гурник Забже" клубы финалда "Ракувты" 2:0 есебімен ұтып, Польша Кубогын иеленді.

Осы кездесудің басты қатысушыларының бірі аңызға айналған Лукас Подольски болды.

2014 жылғы әлем чемпионы алаңға 90-минутта есеп 2:0 болып тұрғанда шықты, бірақ ол аз уақыт ішінде қарсыласына қызыл қағаз алдырып үлгерді, ал финалдық ысқырықтан кейін тізерлеп отырып, жылап жіберді.

Ойыншының өмірбаянына үңілсек, бұл оқиға бұдан да әсерлі бола түседі.

Подольскидің отбасы 1980-жылдардың соңында Польшадан Германияға қоныс аударған, ал әжесі Забжеде қалған.

"Лукас Подольски осыдан көп жыл бұрын әжесіне жергілікті "Гурник Забже" клубына оралып, өнер көрсетуге уәде берген", - деп хабарлайды "433" медиасы.

Айта кетейік, ол әжесіне берген уәдесін 2021 жылы-ақ орындаған, бірақ енді ғана клубпен бірге трофейге қол жеткізді. Сонымен қатар, таяуда Подольски клубтың тең қожайыны атанды.

Еске сала кетейік, Лукас Подольски - Германия чемпионы, Германия Кубогының иегері, Англия Кубогы мен Суперкубогының иегері, Түркия чемпионы және әлем чемпионы.

Өз мансабында ол "Бавария", "Арсенал", "Интер", "Галатасарай", тіпті жапониялық "Виссел Кобе" сапында ойнаған, бірақ әжесіне берген уәдесін орындау үшін тарихи отанына оралды.