Аңызға айналған Роналдиньо 11 жылдан кейін алаңға қайта шығып, матч өткізді

Роналдиньо. Фото: instagram.com/ronaldinho

Атақты футболшы Роналдиньо италиялық "Равенна" сапында өнер көрсетіп, 11 жылдан кейінгі алғашқы матчін өткізді, деп хабарлайды Tengri Sport РБК сайтына сілтеме жасай отырып.

"Равенна" футболдан Италия чемпионатының маңыздылығы жағынан үшінші дивизионында "Форли" командасын 2:0 есебімен жеңді. Голдарды Джулио Донати (36-минут) мен Симоне Рабби (58) соқты.

Роналдиньо негізгі құрамда шығып, бірінші таймды толық ойнады және үзілісте алмастырылған.

Instagram-дағы бұл жарияланымды көру

Sky Sport (Italia) (@skysport) жарияланымы

Ойыннан кейін Роналдиньо алаңға оралу ол үшін ерекше оқиға болғанын мойындады. Instagram-дағы парақшасында ол адреналин, футбол алаңының иісі және доппен қайта ойнау мүмкіндігі оған әрқашан ұмытылмас сезім сыйлайтынын жазды. Футболшы оның арманына сенген "Равенна" басшылығына, сондай-ақ оны қолдауға келген жанкүйерлерге алғысын білдірді.

Instagram-дағы бұл жарияланымды көру

Ronaldo de Assis Moreira (@ronaldinho) жарияланымы

Еске сала кетейік, осы жазда Роналдиньо италиялық "Равеннамен" келісімшарт жасасты. Тамыз айындағы таныстырылымнан кейін жұлдызды ойыншы осы кездесуге дейін жаңа клуб үшін бірде-бір матч өткізбеген еді.

Атақты футболшы мансабын 2015 жылы туған клубы "Флуминенседе" аяқтаған болатын, бірақ футболға қайта оралу туралы шешім қабылдады.

Аңызға айналған жартылай қорғаушы мансабының ең жақсы кезеңін 2003-2008 жылдар аралығында "Барселонада" өткізді. Ол командаға Бразилия құрамасы сапында әлем чемпионы мәртебесінде келіп, Чемпиондар лигасын және Испанияның екі дүркін чемпиондығын жеңіп алуға көмектесті.

2005 жылы ол әлемнің үздік футболшысы деп танылып, "Алтын допты" иеленді, ал жанкүйерлер "Бразилия сиқыршысының" аңызға айналған финттері мен соққыларын осы күнге дейін ұмытқан жоқ.

Пікірлер