Криштиану Роналдудың аспазы футболшы қандай өнімнен бас тартқанын айтты

Әлемдік футбол жұлдызы Криштиану Роналдудың бұрынғы жеке аспазы спортшының тамақтану құпияларын бөлісті, деп хабарлайды Tengri Sport тілшісі The Sun-ға сілтеме жасап.

Аспаз Джорджо Бароне "Әл-Наср" мен Португалия құрамасының шабуылшысы қатаң диетаны ұстанатынын және кейбір өнімдерден бас тартатынын айтты.

"Бароне Роналдудың сүттен бас тартатынын мәлімдеді, өйткені бұл "адам үшін қалыпты жағдай емес". Оның орнына сүт өнімдеріне балама тағамдардың әлдеқайда жақсы екенін атап өтті", - деп келтіреді БАҚ аспаздың сөзін.

Роналду рационының негізін көмірсулар құрайды, бірақ футболшы макарон мен өзге де ұн өнімдерін жемейді.

"Таңғы астан бастасақ: ол авокадоны кофе және жұмыртқамен бірге жейтін, қант мүлде қосылмайды. Мүлде қантсыз. Түскі асқа тауық еті, балық және міндетті түрде көкөніс тұтынады. Егер оған көмірсу қажет болса, оны көкөністерден алады, сондықтан оған ұнның қажеті жоқ. Макарон, нан немесе басқа да өнімдерге жоламайды. Кешке жеңіл тамақтанады, әдетте балық немесе сүбе ет жейді. Әрдайым қасында көкөністер болады", - деді Джорджо Бароне.

Айта кетейік, Криштиану Роналду 41 жасында да алаңға шығып, гол соғуды және керемет физикалық бабын көрсетуді жалғастырып келеді.

Жанкүйерлер португалиялықтың бұлшықеттеріне жиі таңданыс білдіреді.

Сонымен қатар, тамақтанудан бөлек, әлемдік футбол тарихындағы ең үздік бомбардир жаттығу залында да көп уақыт өткізеді, бұл да оның бабына оң әсерін тигізеді.

Роналдуға 1000 голға дейін қанша қалды

Еске салайық, Криштиану Роналду кәсіби футболдағы мансабында 1000 гол межесін бағындыруды көздеп отыр. Қазір португалиялықтың еншісінде 969 гол бар, демек тағы 31 голдан кейін ол әлемде бірінші болып төрт таңбалы санға жететін мерген атануы мүмкін.

Роналдудың әлі бағындырмаған тағы бір биігі - әлем чемпионатындағы жеңіс. Португалия құрамасы бұл мақсатқа 11 маусым мен 19 шілде аралығында АҚШ, Мексика және Канадада өтетін турнирде жетуге тырысады.