“Мбаппе - диктатор“ деген мемді Франция құрамасы қолдап, оны Мобуту деп атады

Франция құрамасының футболшылары жариялаған видеода Усман Дембеле команда көшбасшысы Килиан Мбаппені әйгілі африкалық диктатор Мобутудың атымен атады. Осылайша ұлттық құрама соңғы кезде әлеуметтік желіде тарап кеткен мемдерге әзілмен жауап берді, - деп хабарлайды Tengrinews.kz тілшісі.

Франция футбол федерациясы жариялаған видеода ұлттық құрама ойыншылары ұшақ ішінде бір-бірімен әзілдесіп отырғаны көрінеді. Бір сәтте Дембеле өзгелерге қарап:

"Маған Мобутуды шақырыңдар! Мобут! Әй, Килиан, бері кел!" – дейді.

Осыдан кейін кадрға Килиан Мбаппе шығып, әдейі әсерелеп кейіпк көрсетеді.

Видеодан Мбаппенің өзін Африкадағы ең ықпалды диктаторлардың бірімен салыстырғанына ренжімегені байқалады.

Мобуту кім?

Мобуту Сесе Секо – Конго Демократиялық Республикасының бұрынғы президенті.

1960 жылы ол әскери полковник ретінде Патрис Лумумбаға қарсы мемлекеттік төңкеріске қатысқан. Бес жылдан кейін тағы бір төңкеріс жасап, ел билігін өз қолына алды.

Ол елде африкаландыру саясатын жүргізіп, мемлекетті Заир деп өзгертті. Сол атаумен ел футболдан әлем чемпионатына да қатысқан. Сонымен қатар бизнесті мемлекет меншігіне өткізіп, авторитарлық басқару жүйесін орнатты.

Мобутудың билігі 1997 жылы азаматтық соғыс кезінде көтерілісшілер астанаға кіргеннен кейін аяқталды. Ол елден қашып, сол жылы Мароккода қайтыс болды.

Мбаппені неге "диктатор" деп атайды?

Әлеуметтік желіде Мбаппені командадағы "бәрін өзі шешетін ойыншы" ретінде бейнелейтін мемдер бір жылдан аса уақыттан бері тарап келеді.

Бұл әзілдер мадридтік "Реалдың" жанкүйерлері "Мбаппе – диктатор және Мадридтің №1 жауы" деген жазуы бар сайт жасап, оның клубпен келісімшартының аяқталуына дейінгі уақытты санағаннан кейін кеңінен тарай бастады.

Оған дейін Франция – Колумбия жолдастық матчінде Мбаппенің Шеркиден капитандық таңғышты Кантеденалып, өзіне беруін сұраған сәті де әлеуметтік желіде қызу талқыланған.

Кейін бұған Мбаппе "Пари Сен-Жермен" мен мадридтік "Реалдағы" бапкерлердің қызметтен кетуіне ықпал етті деген түрлі қауесеттер қосылды. Сондай-ақ оның клубтың соңғы бапкері Альваро Арбелоамен ашық жанжалға түскені де айтылды.

Тіпті Францияның әлем чемпионатындағы Сенегалға қарсы алғашқы ойыны кезінде трибунадан Мбаппе диктатор кейпінде бейнеленген плакат байқалған.

Ал Иракқа қарсы матчтің үзілісінде оның жаңбырдан кейін алаңды тазалауға қатысқаны жаңа мемдердің шығуына себеп болды.

Соңғы рет Швециямен өткен матчте жанкүйерлер бас бапкер Дидье Дешамның алаңнан шығып бара жатқан Мбаппеге әзілдеп иілгенін байқап, мұны да "диктатор" туралы мемдерге кезекті ишара ретінде қабылдады.

Сілтемесіз жаңалық оқисыз ба? Онда Telegram желісінде парақшамызға тіркеліңіз!