Месси Аргентина құрамасындағы қоштасу матчінен кейін әсерлі жазба жариялады

Футболист бұл жазбаны Instagram-дағы парақшасында жариялады.

"Кеше менің соңғы матчім өтті, мен қазірдің өзінде құраманың ақ-көгілдір жейдесін сағынып жүрмін. Дұрыс шешім қабылдағанымды білемін. Бұл қуаныш пен мұңға толы ғажайып жол болды, бірақ мен әр басқан қадамымның соған тұрарлық болғанына сенімдімін. Әлі де айтқым келетін нәрсе көп. Барлық сезімімді бірнеше ауыз сөзбен немесе бір жазбамен жеткізу мүмкін емес", - деп атап өтті ол.

Оның айтуынша, ең қажет кездерде жанынан табылып, қолдау көрсеткен отбасысыз бұл белестерді бағындыру мүмкін болмас еді.

"Сондай-ақ достарымның, командадағы барлық әріптесім мен бірге жұмыс істеген жаттықтырушылардың, олардың штабтарының көмегінсіз де бұл нәтижеге жете алмас едім. Еліміздің лайықты орынға ие болуына көмектескен Диегоны (Марадона - ред. ескертпесі) ұмытқым келмейді. Ол бізге әрқашан - осында жанымызда жүріп те, көктен қарап та жолымыздың әр қадамында қолдау көрсетті", - деп жазды Месси.

Ол өзі өнер көрсеткен клубтарға оның сезіміне құрметпен қарап, ұлттық құрамаға бар күшін салуға мүмкіндік бергені үшін алғыс айтты.

"Әрине, Жаратқанға рахмет: Оның жол көрсетуінсіз және қалауынсыз біз мұндай биікке жетуді армандай да алмас едік. Мен ризамын. Сіздерді қатты жақсы көремін, сағынамын және әрқашан бізбен бірге, менің қасымда болғандарыңыз үшін алғыс айтамын", - деп толықтырды құраманың бұрынғы капитаны.

Еске салсақ, 7 қазанға қараған түні Буэнос-Айрестегі (Аргентина) "Монументаль" стадионында Месси Аргентина құрамасы сапында Бенинге қарсы қоштасу матчін өткізді. "Соңғы танго" деп аталған бұл ойын аңызға айналған футболшының құрамадағы мансабы аяқталуын білдіреді.

Стадионға бара жатқан жолдың өзінде мыңдаған адам команданы шығарып салып жатқанда, Месси автобуста көзіне жас алды. Гимн шырқалып жатқанда да капитан толқынысын жасыра алмады. Ойынның 10-минутында матч арнайы тоқтатылып, бүкіл стадион оның нөміріне құрмет ретінде бір минут бойы тік тұрып қол шапалақтады. Месси ортада тұрып, жанкүйерлердің қошеметін қабыл алды.

Матчтен кейін "Монументаль" аспанында дрон шоуы ұйымдастырылды. Жүздеген ұшқышсыз аппараттар аспанда Мессидің бейнесін, "Gracias Leo" жазуын және оның мансабы мен 2022 жылғы әлем чемпиондығына қатысты басқа да нышандарды бейнеледі. Дрондармен қатар отшашулар, музыкалық қойылымдар мен ресми құттықтаулар жалғасты. Месси микрофон алып, жанкүйерлерге арнап сөз сөйледі. Оның сөзі ұзақ әрі тебіреністі болды, толығырақ - материалда.

Осылайша, Лионель Мессидің Аргентина құрамасындағы 21 жылдық тарихы аяқталды. Ол әлем чемпионы атағымен, екі Америка кубогімен, ұлттық құрама сапындағы голдар мен матчтер саны бойынша рекорд орнатып кетті.