Чемпиондар лигасының финалы: Қазақстанда қайда және қашан көруге болады

Сенбі, 30 мамыр күні Чемпиондар лигасының финалында франциялық "Пари Сен-Жермен" мен лондондық "Арсенал" өзара мықтыны анықтайды, деп хабарлайды Tengri Sport.

Шешуші матч Венгрия астанасы Будапешттегі «Пушкаш Арена» стадионында өтеді.

ПСЖ – "Арсенал" матчының тікелей трансляциясы

Кездесу Қазақстан уақытымен 20:50-де басталады. Ойынды Qazsport телеарнасы мен арнаның ресми сайтынан көруге болады.

Финалға дейінгі жол

Лондондық клуб Чемпиондар лигасының жалпы кезеңін бірінші орынмен аяқтады. 1/8 финалда "Арсенал" леверкузендік "Байерден" екі матч қорытындысы бойынша 3:1 есебімен басым түсті. Кейін лиссабондық "Спортингті" 1:0 есебімен ұтты. Ал финал жолдамасы үшін өткен ойында мадридтік "Атлетиконы" 2:1 есебімен жеңді.

Париждіктер топтық кезеңде 11-орын алып, плей-оффты 1/16 финалдан бастады. Алдымен "Монаконы" екі матч қорытындысы бойынша 5:4 есебімен жеңсе, кейін "Челсиді" 8:2 есебімен айқын ұтты. Ширек финалда "Ливерпульді" екі рет 2:0 есебімен қапы қалдырды. Ал жартылай финалда "Бавариямен" тартысты ойын өткізіп, екі матч қорытындысы бойынша 6:5 есебімен басым түсті.

Айта кетейік, "Арсенал" өз тарихында Чемпиондар лигасының финалында екінші рет ойнағалы отыр. Лондондық клуб осыдан 20 жыл бұрын өткен финалда "Барселонадан" 1:2 есебімен жеңілген еді.

ПСЖ үшін де бұл – турнир тарихындағы екінші финал. Париждік клуб былтыр шешуші ойында "Интерді" 5:0 есебімен ойсырата ұтып, бас жүлдені жеңіп алған болатын.

Бұған дейін ағылшындық "Кристал Пэлас" Конференция лигасының финалында испаниялық "Райо Вальеканодан" басым түскені хабарланған еді.

Ірі есептегі жеңіс Еуропа лигасының жеңімпазын анықтады