“Қайрат“ бапкері Чемпиондар лигасы матчінде алаңнан қуылған ойыншы туралы айтты

Фото: instagram.com/omonoiafootball/

"Қайраттың" бас бапкері Рафаэль Оразбахтин кипрлік "Омониямен" болған алғашқы сырт алаңдағы ойында жеңіліске ұшырағанына қарамастан, командасының Чемпиондар лигасының үшінші іріктеу кезеңіне шығуға мүмкіндігі бар екенін мәлімдеді, деп хабарлайды Tengri Sport алматылық клубтың баспасөз қызметіне сілтеме жасап.

"Омония" - "Қайрат" матчі 1:0 есебімен алаң иелерінің пайдасына аяқталды. Бұл ретте алматылықтар тәлімгерінің пікірінше, қарсылас бірінші таймдағы ойыншысының алаңнан қуылғанына байланысты өзінің үздік қасиеттерін көрсете алмаған.

"Мен бұл өте білікті футболшылары мен бапкері бар, сапалы әрі мықты команда екенін бірден айтқанмын. Сондықтан олардың деңгейіне күмәніміз болған жоқ. Иә, матч сәл олардың жоспары бойынша өтпеді. Ойыншысы алаңнан қуылғаннан кейін олар есепті ұстап тұруға тырысқандықтан, өздерінің бар мүмкіндігін көрсете алмады", - деді ол баспасөз мәслихатында.

Оразбахтиннің айтуынша, алғашқы кездесуде гол соға алмағанымен, алматылықтардың жалпы жеңіске жетуге жақсы мүмкіндігі бар.

"Өткен жылы біз сырт алаңда "КуПС" командасынан 2:0 есебімен ұтылып, бір аптадан кейін өз үйімізде 3:0 есебімен жеңгенбіз. Мүмкіндік әрдайым бар. Барлығы өзімізге байланысты болады", - деп атап өтті жаттықтырушы.

Еске сала кетейік, өткен маусымда "Қайрат" Чемпиондар лигасының іріктеу кезеңінің төрт кезеңінен де өткен болатын, ал екінші айналымда керемет камбэк жасаған еді. Финляндияда жергілікті "КуПС" клубынан 0:2 есебімен жеңілгеннен кейін, команда өз алаңында жауапсыз үш гол соғып, келесі кезеңге жолдама алған болатын.

"Омониямен" болған матчке келер болсақ, 34-минутта қарсылас команда ойыншысы алаңнан қуылғаннан кейін, алматылықтар бастаманы өз қолдарына алып, қарсылас қақпасына жалпы саны 14 соққы бағыттады.