Кварацхелия “Барселонамен“ өткен матчте алған ауыр жарақатынан кейін жанкүйерлерге үндеу жасады

"Мұндай күйде жүргенімде маған көпшілік сұрақ қойды. Тіпті көбі егер әлемдегі барлық футболшы дұға етсе, матч тең аяқталар еді десті. Бұл шындық та шығар, бірақ мен әр ойын алдында Құдайдан алаңнан аман-сау шығуды тілейтінмін, алайда бәрі бекер болды.

Көп уақыт өтпесе де, басымда "неге дәл мен?" деген сұрақ мазалайды. Мен бұл ойын үшін ештеңемді аяған емеспін. Шамасы, бұл матчке өмірімдегі кез келген ойыннан артық дайындалған сияқтымын. Өзімді бәріне дайынмын деп ойладым, бірақ бұған емес. Десе де, Құдайдың мені таңдағанын түсінемін. Егер осы арқылы алаңдағы басқа футболшыларды қорғап қалған болсам...

Мен бұл айларды жұмыспен, ауырсынумен және көз жасымен өткізуге дайынмын. Әрқашан жанымда болатын халқым үшін бұрынғыдан да мықты болып оралуым керек екенін білемін. Мен сіздерді жерге қаратпаймын, бір минутты да бос жібермеймін деп уәде беремін. Қолдауларыңыз үшін рақмет. Жақында көріскенше", - деп жазды Кварацхелия.

25 жастағы грузин футболшысы Чемпиондар лигасының "Барселонаға" қарсы матчінде оң тізесінің алдыңғы айқасқан сіңірін үзіп алды. Хвича каталониялықтардың қорғаушысы Хави Эспартпен соқтығысып, 59-минутта алмастырылды. ПСЖ футболшының жақын арада ота жасататынын хабарлады.

Жарақатына байланысты жартылай қорғаушы маусымның қалған бөлігін өткізіп алуы мүмкін. Осы маусымда Кварацхелия ПСЖ сапында барлық турнирде 11 матч өткізіп, екі гол соқты және бір нәтижелі пас берді. Грузиялық футболшы 2026 жылдың қорытындысы бойынша "Алтын допқа" үміткерлер тізіміне енген.