Стадион жабылды, жеке аренаға кіре алмайды
"Каспий" клубының жасөспірімдер құрамындағы тәрбиеленушілердің ата-аналары балалар жаттығусыз қалған соң басшылыққа барды. Олардың айтуынша, мұндай жағдай бірінші рет болып отырған жоқ: бұған дейінгі айларда да сабақ тоқтаған. Бұрын жас футболшылар 12-шағынаудандағы "Жас қанат" стадионында жаттығатын. Нысан күрделі жөндеуге жабылғаннан кейін балаларды BS Arena жеке алаңына ауыстырған. Бірақ ол жерде де мәселе туындады.
"Сұрасақ жалдау ақысы төленбегенін айтады. Қазір тағы қазынашылықта ақша жоқ деп жатыр. Бірақ бізге оның қандай қатысы бар? Бұл біздің мәселе емес қой. Мұндай мәселелерді облыстық спорт басқармасы жылдың басында шешуі керек деп есептеймін. Бәрі бюджетте алдын ала қарастырылып, желтоқсанға дейін қалай жұмыс істеу керек екені жоспарланып, тиісті мақсаттар қойылуы тиіс. Бірақ мұның бірі де жоқ. Ал енді бізге: "Күте тұрыңыздар" дейді. Біз тағы қанша күтеміз?", - деді журналистерге клуб тәрбиеленушілері бірінің анасы Салтанат Ешманова.
Ата-аналарға BS Arena алаңы қолайсыз болып шықты. Ол Ақтаудың жоғарғы жағында орналасқан, ал ол жерге тікелей автобус қатынамайды. Футболшылар бірінің әкесі Елжас Ешмановтың айтуынша, балалар аялдамадан бір шақырымнан аса жолды жаяу жүріп, жолдан өтіп, жолға қосымша уақыт жұмсауға мәжбүр. Бірақ сүйікті спорт түрі үшін оқушылар осы қолайсыздықтың бәріне төзіп келген. Алайда кейін уақытта мүлдім жаттығусыз қалды.
"Бізге: "Уақыт жоқ, мүмкіндік жоқ болғандықтан жаттығулар тоқтатылады" дейді. Бірақ нақты ешкім түсіндірмейді: төлем қай мерзімде жасалады, жаттығулар қашан қайта басталады? "Каспий" футбол клубының басшылығы тарапынан да ешкім бізбен байланысқа шықпайды, не болып жатқанын түсіндірмейді. Бәрін өзіміз біліп жүрміз", - дейді ата-ана.
Әр баладан 150 мың теңге
Ата-аналардың тағы бір шағымы - жарыстар шығыны. Олардың айтуынша, отбасылар жас футболшылардың сапарларын өздері қаржыландырады, өйткені клуб бұған ақша бөлмейді. Салтанат Ешманованың сөзінше, бір сапар әр балаға шамамен 150 мың теңгеге түседі. Бір топ құрамында жарысқа 20-ға жуық футболшы бара алады. Ата-аналар балалардың билеттерін, жатын орны мен тамағын, сондай-ақ жаттықтырушылардың жолы мен іссапар шығынын төлейді.
"Жыл сайын бізде ата-аналармен жиналыс өткізіп: "Балаларды турнирге жібересіздер ме?" деп сұрайды. Сосын ақша жоқ екенін айтады. Қаласаңыздар, сапарды өз қалталарыңыздан төлеңіздер дейді. Біз, әрине, балаларымыз үшін бәрін жасаймыз. (...) Бұл шығындардың бәрі облыстық спорт басқармасы бөлген қаражат есебінен өтелуі тиіс. Бізге ешқашан ештеңе бөлінген емес, бірақ біз бұған көз жұмып келдік. Ал енді не істейміз деп сұрағанымызда, жаттықтырушылар облыстық спорт басқармасы олардың жалақысын кешіктіріп жатқанын айтады. Оның үстіне, жалдау ақысы да төленбегенін алға тартады. Жаттығу өткізетін жер жоқ", - дейді футболшылардың ата-аналары.
Футбол клубына 1,5 миллиард теңге бөлінді
Футбол клубы BS Arena-мен келісімшарт аяқталғанын растады. Алайда "Каспий" ФК басшысының орынбасары Марат Тәкенов мәселе жалдау ақысы төленбегенінде емес екенін нақтылады. Оның айтуынша, клуб алаңды пайдаланғаны үшін есеп айырысқан, ал келісімшарт мерзімі бітуіне байланысты аяқталған. 2026 жылы бөлінген қаржы тек қарашаға дейін жеткен.
"Жыл басында біз BS Arena-мен келісімшарт жасадық. Барлық бала, соның ішінде дубль құрамы мен әйелдер командасы жаттығуларын толықтай сонда өткізді. Қазақстан чемпионатының матчтері де сол жерде өтті. Бізге бөлінген қаражат тек қарашаға дейін жеткендіктен, BS Arena-мен келісімшарт мерзімі аяқталуына байланысты тоқтатылды. Алайда қазір біз балалар спорт мектебімен келіссөздер жүргізіп жатырмыз. Нақтырақ айтқанда, біз келісімге келдік. Егер бәрі сәтті болса, келесі аптадан бастап балалар кестеге енгізіліп, осында жаттығады", - деді Тәкенов.
Алайда келесі жылы не болатыны белгісіз. Клубтың ақпараты бойынша, "Каспий" жеке меншікке беруге дайындалып жатыр, сондықтан жаттығу алаңдарына қатысты алдағы шешімді жаңа басшылық қабылдайды.
Жарысқа баруға қатысты мәселе бойынша, клуб қаржыландырудың жоқтығын спортшылардың жас санатымен түсіндірді.
"Бұл жерде ең кіші жастағы балалар, яғни біздің жас футболшыларымыз туралы сөз болып отыр. Қарапайым тілмен айтқанда, бұл жастағылар бізде сыртқа шықпайтын санатқа жатады. Олар үшін қаржыландыру қарастырылмаған. Қателеспесем, 2014 жылғы және одан ересек балалар ғана жарыстарға шыға алады. Ал 2015, 2016 және 2017 жылы туғандар сыртқа шықпайтын жас санаттарына жатады. Кейбір жаттықтырушылар балалармен өздері барып, сапарларды өз бетінше ұйымдастырып жүр. Алайда, қазір біз бұл жас топтарын қаржыландырып, жарыстарға жібере алмаймыз", - деп жауап берді "Каспий" ФК басшысының орынбасары.
Сонымен қатар Тәкенов 2026 жылы "Каспий" футбол клубына 1,5 миллиард теңге бөлінгенін хабарлады. Бұл қаражат Премьер-лигада өнер көрсететін негізгі құрамды, дубльді, әйелдер командасын, жасөспірімдер құрамдарын және QJ League командаларына арналған. Бұл соманың жеткіліктілігі туралы сұраққа клуб өкілі шығындар мен сметалар ашық екенін мәлімдеді.
Сонымен қатар ата-аналармен әңгімелесу барысында Тәкенов бұған дейін клубта жаттықтырушылардың жалақысы бойынша расында берешек болғанын мойындады. Оның айтуынша, алайда кездесу өткен сәтке дейін барлық төлем толығымен жүргізілген.