9 әлем чемпионы: қазақстандық шахматшылар жаңа рекорд орнатты

Шахматтан Қазақстан құрамасы Сербияның Врнячка-Баня қаласында өткен жасөспірімдер арасындағы рапид пен блицтен әлем чемпионатында 21 медаль жеңіп алды, деп хабарлайды Tengri Sport Қазақстан шахмат федерациясына (ҚШФ) сілтеме жасап.

Түрлі жас санаттарындағы Әлем чемпионаты 15-20 сәуір аралығында өтті. Қазақстанның бірден тоғыз өкілі елге алтын медальмен оралады. Рапид пен блиц турнирлерінің қорытындысы бойынша команда жалпы есепте 1-орынды иеленді.

Шахматтан Қазақстаннан шыққан әлем чемпиондары

Турнирдің алғашқы күндерінде-ақ рапидтен қазақстандықтар алтын жүлделерді иелене бастады. Шымкенттік Аслан Ендібаев 8 жасқа дейінгі санатта басты қарсыласы ресейлік Михаил Шишовты жеңіп, турнирде топ жарды.

10 жасқа дейінгі қыздар арасында Аделина Нұрханқызы 11 турда 9 жеңіске жетіп, жеке-дара бірінші орынды иеленді. Рамазан Төлеген 12 жасқа дейінгі санатта алтын алса, Алдияр Аңсат 18 жасқа дейінгі санаттағы тартыста тағы бір қазақстандық Даниял Сәпеновті басып озды.

Ең күтілген жеңіс 16 жасқа дейінгі санаттағы Елназ Қалиахметтің жетістігі болды. Ол турнирдегі 11 партияның 10-ында жеңіске жетіп, алтын медальды қанжығасына байлады.

Айта кетейік, бойжеткен Қазақстанның ересектер құрамасына кіреді және былтыр Әлем кубогында нағыз сенсация жасап, Грузияның әлем чемпионы Нино Бациашвилиді жеңген болатын.

Блиц турнирінде Венера Жақышева (8 жасқа дейінгі қыздар), Алиша Бисалиева (10 жасқа дейінгі қыздар), Алдияр Жарас (14 жасқа дейінгі ашық санат) және Зарина Нұрғалиева (18 жасқа дейінгі қыздар) жеңіске жетті.

Қазақстандықтар блиц пен рапид турнирлерінің жалпы нәтижесінде 9 алтын, 7 күміс және 4 қола жүлде иеленді.

ҚШФ мәліметінше, 21 медаль - ұлттық құраманың мұндай турнирлердегі ең үздік нәтижесі. Бұған дейін 2024 жылғы 16 медаль рекордтық көрсеткіш болып саналған еді.