“Cағындым“: Елена Рыбакина 62 миллиондық суперкары туралы айтты

Қазақстандық теннисші, әлемнің екінші ракеткасы Елена Рыбакина Штутгарттағы (Германия) WTA 500 турнирінің 1/8 финалындағы жеңісінен кейін өзінің көлігі мен жүргізуші куәлігі туралы айтып берді, деп хабарлайды Tengri Sport.

Қазақстанның бірінші ракеткасы Елена Рыбакина Штутгарттағы (Германия) WTA 500 турнирінің бастапқы кезеңінде ресейлік теннисші, әлемнің 19-ракеткасы Диана Шнайдермен кездесті. Матч 6:3, 6:4 есебімен Рыбакинаның жеңісімен аяқталды.

Матчтан кейінгі сұхбатында Рыбакина өзінің Porsche Taycan 4s автокөлігі туралы сұраққа жауап берді. Бұл көлікті ол аталған турнирде 2024 жылы жеңіске жеткені үшін сыйға алған болатын. Ол кезде көліктің құны 131,7 мың еуроға (62,6 миллион теңге) бағаланған. Сол уақытта Рыбакинаның жүргізуші куәлігі болмағандықтан, көлік бос тұрған еді.

Қазақстандық спортшыдан қазіргі жағдай туралы сұрағанда, Рыбакина өз көлігін үнемі айдайтынын және көлік жүргізуден ләззат алатынын айтты. Сондай-ақ теннисші жүргізуші емтиханын дәл осы көлікпен тапсырғанын жеткізді.

"Турнирдегі жеңіс маған емтихан тапсырып, жүргізуші куәлігін алуға жақсы серпін берді. Қазір куәлігім бар. Маған көлік ұнайды. Маусымаралық дайындық кезіндегі сапарлар ұнайды. Біз үнемі жолда жүретіндіктен, көлік жүргізуді аздап сағынамын. Бұл тамаша болды. Қайта оралғаныма өте қуаныштымын", - деді Рыбакина.

Бұған дейін Елена Рыбакина Tengri Sport тілшісіне берген сұхбатында көлігінің тағдыры туралы айтқан болатын. Қазақстандық теннисші көлігін Дубайға алдырып, сол жерде жүргізуші емтиханын тапсырған және маусымаралық кезеңде оны белсенді қолданған. Рыбакинаның айтуынша, қазір ол барлық жерге осы көлікпен барады.

– Штутгарттағы өткен жылғы жеңісіңіз үшін берілген суперкардың жағдайы қалай? Маусым аяқталған соң онымен жүрудің сәті түсіп жатыр ма? Әлде сатып жібердіңіз бе?

"Жоқ, сатқан жоқпын. Айдап жүрмін – дәл қазір маусымаралық дайындығым басталды, мен Дубайдамын, сондықтан барлық жерге осы көлікпен қатынаймын", - деген еді Рыбакина.

Айта кетейік, Porsche компаниясы жыл сайын Штутгарттағы (Германия) WTA 500 турнирінің жеңімпазына автокөлік сыйлайды. Рыбакина 2024 жылы Taycan 4s алса, латвиялық теннисші Елена Остапенко 2025 жылы Porsche Macan Turbo ұтып алды. 2026 жылғы турнирде Porsche 911 Carrera S сарапқа салынады.