WBC қазақстандық әлем чемпионына қатысты шешім қабылдады

Бейнежазбадан кадр/ Фото: instagram.com/boxingkazakhstan

Әуесқой бокстан қазіргі әлем чемпионы Санжар Тәшкенбай кәсіпқой бокстан бірінші аса жеңіл салмақтағы планетаның үздік 40 боксшысының қатарына енді, деп хабарлайды Tengri Sport Дүниежүзілік бокс кеңесінің (WBC) баспасөз қызметіне сілтеме жасап.

23 жастағы әлем чемпионы 28 тамызда Астана рингінде кәсіпқой бокстағы алғашқы жекпе-жегін өткізді. Тәшкенбай Нил Джакамосқа (7-2, 1 КО) қарсы 10 раунд өткізіп, төрешілердің бірауыздан шығарған шешімімен WBA Asia белбеуін иеленді.

WBC ұйымның рейтингін жариялады, оған сәйкес қазақстандық боксшы рейтингте 35-орынға тұрақтады.

Айта кетейік, тек алғашқы 40 орын ғана жарияланады және бұл салмақ дәрежесінде еліміздің өзге өкілдері жоқ.

Фото: wbcboxing.com/en/lightflyweight/

Еске салайық, бұған дейін Санжардың салмақ дәрежесі бағдарламадан алынып тасталуына байланысты ол Азия ойындарына қатысатын Қазақстан құрамасына енбей қалған болатын.

Осыдан кейін Тәшкенбай кәсіпқой аренада бағын сынау туралы шешім қабылдады.

Санжар Тәшкенбай - екі дүркін әлем чемпионы

Еске салайық, Санжар Тәшкенбай 19 жасында-ақ Ташкентте (Өзбекстан) өткен бокстан ересектер арасындағы әлем чемпионатын жеңіп алған болатын. Ал өткен жылы Ливерпульдегі (Англия) турнирде 50 келіге дейінгі салмақ дәрежесінде екі дүркін әлем чемпионы атанды.

Сонымен қатар қазіргі уақытта оның салмақ дәрежесі тек Азия ойындарының ғана емес, Олимпиада бағдарламасында да жоқ. Ол ел тарихындағы бокстан алғашқы үш дүркін әлем чемпионы атануы мүмкін, бірақ басты додада өнер көрсетпеуі де ғажап емес.

Бұған дейін Қазақстанның тағы бір әлем чемпионы — Абылайхан Жүсіповтің де Азия ойындарына бармайтыны белгілі болған. Оның салмақ дәрежесінде жас боксшы Төрехан Сабырхан бақ сынайды.