Қазақстандық бокстан әлем чемпионы Азиадаға бармайды: не болды?

Фото: instagram.com/iba_official/ҚР ҰОК

Қазақстан бокс федерациясы Азия ойындарына қатысатын әйелдер мен ерлер ұлттық құрамаларының ресми тізімін жариялады. Олардың қатарында қазіргі әлем чемпионы Абылайхан Жүсіпов жоқ, деп хабарлайды Tengri Sport.

Азиада алдындағы кейінгі айларда ерлер құрамасына қатысты дау өршіген болатын. Әлеуметтік желілерде 70 келіге дейінгі салмақ дәрежесінде Ойындарға кімнің баратыны туралы шешім сыртқы қысыммен қабылданды деген нұсқалар айтылды.

Бұл салмақ дәрежесінде Қазақстан құрамасында бірегей жағдай қалыптасты: әртүрлі нұсқалар бойынша екі бірдей әлем чемпионы бір орынға үміткер болды. Тәжірибелі Абылайхан Жүсіпов IBA нұсқасы бойынша турнирде жеңіске жетсе, жас боксшы Төрехан Сабырхан World Boxing тұжырымы бойынша үздік атанды.

Нәтижесінде жаттықтырушылар штабы Төреханды таңдады.

"Толық құрамды ерлер мен әйелдер командаларының бас жаттықтырушылары анықтады. Өңірлер тарапынан ешқандай араласу, министрлік немесе Федерация тарапынан қысым болған жоқ. Азия ойындарына үміткерлер тек спорттық шеберліктеріне қарай таңдалды.

Мысалы, 70 келі салмақ туралы айтатын болсақ, Азия ойындары - бәрінің соңы емес. Бізде келесі жылы әлем чемпионаты бар. Одан кейін азиялық іріктеу және Олимпиада ойындарына дейін тағы екі іріктеу турнирі болады, былайша айтқанда, төрт негізгі дода күтіп тұр. Сондықтан Азия ойындарымен ештеңе бітпейді", - деді ҚБФ атқарушы директоры Рауан Игенев тілшімізге берген сұхбатында.

Instagram-дағы бұл жарияланымды көру

Төрехан Сабырханның (@sabyrkhantorekhan) жазбасынан

Біз іріктеуге қатысты пікір білу үшін Абылайхан Жүсіповке хабарластық. Боксшы іріктеудің нақты болмағанын айтады, бірақ штабқа ешқандай өкпе-реніші жоқ.

"Іріктеу болған жоқ, құрамды жаттықтырушылар құрамы мен басшылық шешті. Бұл жерде ешқандай наразылық жоқ және болуы да мүмкін емес. Себебі кім шықса да, ел намысы сынға түседі. Жігіттеріміз лайықты өнер көрсетеді деп ойлаймын", - деді чемпион тілшімізге берген жауабында.

Instagram-дағы бұл жарияланымды көру

Жарияланым авторы: 𝐀𝐛𝐥𝐚𝐢𝐤𝐡𝐚𝐧 𝐙𝐡𝐮𝐬𝐬𝐮𝐩𝐨𝐯 (@jussupov_ablaikhan)

Бокстан Азия ойындарына қатысатын Қазақстан құрамасы

Ерлер

55 келіге дейін - Махмұд Сабырхан;
60 келіге дейін - Оразбек Асылқұлов;
70 келіге дейін - Төрехан Сабырхан;
80 келіге дейін - Сабыржан Аққалықов;
90 келіге дейін - Нұрбек Оралбай;
90 келіден жоғары - Айбек Оралбай.

Бас жаттықтырушы - Нұржан Насанов.

Әйелдер

51 келіге дейін - Алуа Балқыбекова;
54 келіге дейін - Назым Қызайбай;
60 келіге дейін - Виктория Графеева;
65 келіге дейін - Аида Әбікеева;
75 келіге дейін - Наталья Богданова.

Бас жаттықтырушы - Елдос Сайдалин.

Еске сала кетейік, Азия ойындары Жапонияда 19 қыркүйек пен 4 қазан аралығында өтеді.

Бұған дейін бокстан Қазақстан құрамасының сабына тағы бір әлем чемпионы - Санжар Тәшкенбайдың енбей қалғаны белгілі болған еді. Оның салмақ дәрежесі бағдарламаға енбеген.

Осыдан кейін Санжар кәсіпқой бокстағы мансабын бастауға шешім қабылдады.