WBO Әлімханұлына жаңа қарсылас тағайындады

Орта салмақтағы бұрынғы әлем чемпионы, қазақстандық Жәнібек Әлімханұлы супер орта салмақтағы белбеу үшін британдық Хамза Ширазбен жекпе-жекке шығуы тиіс еді, алайда Шираз титулдан бас тартуды жөн көрді.

Енді Әлімханұлы WBO-ның бос тұрған белбеуін 25 жастағы жеңілмеген даниялықпен айқаста сарапқа салады. Ұйым келіссөздерді белгілеп, оның шарттарын жариялады.

"Тараптарға осы хабарлама шыққан сәттен бастап келіссөздер жүргізу және 2026 жылғы 7 қазан, сәрсенбі, AST уақыты бойынша сағат 16:00-ден кешіктірмей келісімге келу үшін 15 күн уақыт беріледі.

Осы қаулының талаптары орындалмаған жағдайда Комитет жағдайға дереу араласады, содан кейін мәселе WBO-ның чемпиондық жекпе-жектерді өткізу регламентіне сәйкес промоутерлік сауда (purse bid) процедурасына беріледі.

Сонымен қатар, екінші орта салмақтағы WBO титулы бойынша промоутерлік сауда үшін өтінімнің ең төменгі сомасы 300 000 АҚШ доллары (үш жүз мың доллар) мөлшерінде белгіленгенін хабарлаймыз", - делінген мәлімдемеде.

Банк қазақстандықтан 7 жасқа кіші болса да, оның кәсіпқой карьерасында 20 жекпе-жек өткен, оның 11-ін мерзімінен бұрын аяқтап, бірде-бір рет жеңілмеген. Сонымен қатар оның қоржынында WBO Global титулы бар - ол бұл белбеуді тәжірибелі кубалық Уильям Скуллды нокаутқа түсіріп иеленген болатын.

Айта кетейік, Жәнібекпен жекпе-жекке Якоб Банктен бөлек орта салмақтағы әлем чемпионы Карлос Адамес те үміткер болған еді. Ол әлеуметтік желіде қазақстандыққа үндеу тастағанымен, Әлімханұлы оны елеусіз қалдыруды жөн көрді. Қазақстандық боксшының менеджері Tengri Sport-қа берген сұхбатында доминикандықтың "хайп жинағысы келетінін" мәлімдеді.

"Қазақтан қашу": Әлімханұлының титулдық жекпе-жегі неге өтпей қалды?

Еске сала кетейік, Әлімханұлының промоутерлері бұған дейін британдық Хамза Шираздың промоутерлерімен сауда өткізген болатын. Қазіргі чемпион жекпе-жек үшін шамамен 750 мың доллар алуы тиіс еді, бірақ ол бұл соманы аз деп есептеді.

Америкалық БАҚ сауда басталмай тұрып-ақ осындай сценарий болатынын болжап, британдықтың бұл әрекетін ашықтан-ашық "қазақтан қашу" деп атады.

Естеріңізге сала кетейік, британдық боксшы Жәнібек Әлімханұлына қарсы жекпе-жектен бұған дейін бір рет жалтарған болатын. Екі жыл бұрын екі боксшы да орта салмақта өнер көрсетіп жүргенде, олардың арасында қазақстандыққа тиесілі титул үшін жекпе-жек жоспарланған еді.

Сол кезде Шираз көпшілік алдында Жәнібектің белбеуіне үміткер ретінде шығуға келіскенімен, кейін оның командасы келіссөздерден шығып кеткен болатын.