+7 (777) 001 44
99
Британиялық Хамза Шираз ресми түрде WBO белбеуінен бас тартқаннан кейін, ұйым бос тұрған титул үшін жекпе-жек белгілеуге уәде берді. Оған қазіргі міндетті үміткер ретінде Әлімханұлы міндетті түрде қатысады.
Tengri Sport басылымы жаңа титулдық кездесуде кімді күтуге болатынын анықтау үшін боксшының менеджері Берік Сұлтанмен байланысты.
WBO титулы бар жеңілмеген нокаутшы: Әлімханұлының ықтимал қарсыласы туралы не белгілі?
Қазақстандық боксшының менеджерінің пікірінше, Жәнібектің супер орта салмақтағы бос тұрған WBO титулы үшін ең ықтимал қарсыласы - даниялық Якоб Банк.
"Меніңше, бұл үлкен ықтималдықпен Банк болады. Неге? Өйткені ол Жәнібекпен бір уақытта титулдық жекпе-жекке үміткер болған. Олар өтініш берді, оларға бас тартылды, ал Жәнібекке рұқсат берілді, енді бұл белбеу бос тұр. Оның чемпиондық атақ үшін жұдырықтасатыны қазірдің өзінде түсінікті деп ойлаймын. Бұл - жеке менің пікірім. Жәнібектің ресми қарсыласы ертең-бүрсүгіні жариялануы тиіс деп ойлаймын", - деді менеджер Tengri Sport-қа берген сұхбатында.
Сонымен қатар қазіргі уақытта ешқандай келіссөздер жүріп жатқан жоқ. Олар тек ресми хабарландырудан кейін ғана басталады.
"WBO-дан ақпарат күтіп отырмыз, өйткені қазір Top Rank те, мен де, Жәнібек те қарсыласты өз бетімізше таңдай алмаймыз", - деп атап өтті Берік Сұлтан.
Айта кетейік, WBO Әлімханұлын белбеуге міндетті үміткер етіп тағайындау туралы мәлімдемесінде даниялық Якоб Банктың да талаптары туралы айтқан болатын.
Қазіргі уақытта оның есебінде 20 кәсіпқой жекпе-жек бар, оның 11-інде ол мерзімінен бұрын жеңіске жетіп, бірде-бір рет жеңіліс таппаған.
Сонымен қатар 2026 жылдың басында Банк тәжірибелі кубалық Уильям Скуллды 12-раундта нокаутқа түсіріп, WBO Global белбеуін жеңіп алды.
Instagram-дағы бұл жарияланымды көру
"Әлеуметтік желідегі мықты боксшы": әлем чемпионының шақыруына жауап
Жәнібек Әлімханұлының ықтимал қарсыластарының қатарында жанкүйерлер доминиканалық орта салмақтағы WBC әлем чемпионы Карлос Адаместі де қарастырып жатыр. Бұған дейін ол әлеуметтік желілерде қазақстандыққа үндеу тастауды ұйғарған еді.
Менеджердің айтуынша, Адамес осылайша жай ғана өзіне назар аудартқысы келеді.
"Адамеске келсек - ол жақсы жауынгер. Бірақ ол әлеуметтік желіде ғана мықты боксшы. Оған ресми ұсыныстар жасалды. Жәнібектің оны тек желіде емес, бірнеше рет жекпе-жекке шақырғанын бәрі біледі. Келіссөздер ресми деңгейде болды. Бірақ олар Жәнібекпен жұдырықтасқысы келмеді.
Меніңше, ол жай ғана жұрттың есінен шығып кетпеу үшін "хайп" жасағысы келеді. Өйткені Жәнібекке біреу бірдеңе жазса, оның бірден жауап беретінін бәрі біледі. Бірақ бұл жолы Жәнібек оған жауап бермеуді жөн көрді. Адамеске қазір назар жетпей жатқан сияқты, ал оның Жәнібекпен жұдырықтаспайтыны - анық нәрсе", - деді Берік Сұлтан.
Еске сала кетейік, Адамес пен Әлімханұлы бұған дейін орта салмақта өнер көрсетіп, әртүрлі нұсқалар бойынша әлем чемпиондары болған. Бокс ұйымдары олардың арасында үш титул сарапқа салынатын біріктіруші жекпе-жек ұйымдастыруға тырысқан болатын.
Instagram-дағы бұл жарияланымды көру
2025 жылдың шілде айының басында Әлімханұлы Карлос Адамеспен орта салмақтағы WBO, IBF (қазақстандықтың белбеулері) және WBC (доминикандықтың белбеуі) нұсқалары бойынша әлем чемпионы атағы үшін жекпе-жекке келісімшартқа отырғанын мәлімдеген.
Алайда қазақстандық боксшының айтуынша, Адамес жекпе-жектен қашқақтап, келісімшартқа қол қоймаған. Әлімханұлы қарсыласын қорқақтығы үшін айыптады. Осыдан кейін боксшылар арасында әлеуметтік желілерде сөз таластырды.
Instagram-дағы бұл жарияланымды көру
Қазіргі уақытта Адамес WBC нұсқасы бойынша орта салмақтағы әлем чемпионы болып қала береді, ал Жәнібек Әлімханұлы ауырлау салмаққа ауысу үшін осы санаттағы WBO титулынан бас тартты. Енді қазақстандық боксшы супер орта салмақтағы WBO белбеуіне міндетті үміткер саналады.
Әлем чемпионы Әлімханұлын жекпе-жекке шақырды: оның иелігінде WBC белбеуі бар
