“Үшінші емес, экс-бірінші“: Соболенконы таныстыру сәті жанкүйерлерге ұнамай қалды

Бейнеден кадрБейнеден кадр

Беларусь спортшысы, әлемнің үшінші ракеткасы Арина Соболенко Ұлттық баскетбол қауымдастығының (ҰБА) матчінде әлемнің бұрынғы бірінші ракеткасы ретінде таныстырылды. Ұйымдастырушылардың бұл шешімі көптеген жанкүйерге ұнамай қалды, деп хабарлайды Tengri Sport.

Беларусь теннисінің жұлдызы "Юта" мен "Лос-Анджелес Лейкерс" арасындағы ойынға барып, трибунадағы жұртшылық оны қошеметпен қарсы алды. Дегенмен, ұйымдастырушылар спортшыны таныстыру кезінде оның басқа жетістіктеріне емес, әлемдік рейтингтің бұрынғы көшбасшысы мәртебесіне басымдық беруді жөн көрген.

"Арина Соболенко. WTA рейтингінің бұрынғы 1-нөмірі - 107 апта", - деп жазылды матч трансляциясында.

Кейбір жанкүйерлер мұндай таныстыруды атақты теннисшіні қорлау деп есептеді.

"Үлкен дулыға чемпионы" деудің орнына "бұрынғы 1-нөмір..." деп жазу - нағыз сорақылық";

"Бұрынғы 1-нөмір" дегенше, "Үлкен дулыға турнирлерінің 4 дүркін жеңімпазы" деп айтуға болар еді";

"Оның 2024 жылдан бастап таяу уақытқа дейін бірінші орында болғанын ескерсек, "бұрынғы" деген сөз өте орынсыз естіледі. Ол ҰБА матчіне қолайсыз сәтте барған сияқты", - деп атап өтті жанкүйерлер.

Алайда көпшілікке Соболенконың қалай таныстырылғаны емес, сырт келбеті ұнамай қалды.

"Мыстан! Теннис тарихындағы ең сұрықсыз келбет!"


"Ботокс тым көп жасатқан".


"Аузы біртүрлі, резеңкеден жасалғандай көрінеді", - деп жазды олар.

Еске сала кетейік, Арина Соболенко US Open финалында қазақстандық Елена Рыбакинадан жеңілгеннен кейін әлемнің бірінші ракеткасы мәртебесінен айырылып қалған. Әлемдік рейтинг көшбасшылығын Қазақстан өкілі иеленді.

Айта кетейік, ҰБА-дағы бұл жағдай Соболенконың келбеті әлеуметтік желіде жанкүйерлер арасындағы пікірталасқа себеп болған бірінші оқиға емес. Бұған дейін оның жартылай жалаңаш суреттері резонанс тудырған.

Instagram-дағы бұл жарияланымды көру

Арина Соболенконың (@arynasabalenka) жарияланымы

Соболенко - әлемдік теннисте Рыбакинаның басты қарсыласы

Еске сала кетейік, Арина - қазіргі атақты теннисшілердің бірі. Оның еншісінде US Open-дегі екі жеңіс пен Australian Open-дегі екі жеңіс, сондай-ақ "Ролан Гаррос" пен WTA Қорытынды турнирінің финалы бар.

Ол екі жылға жуық уақыт бойы әлемдік рейтингті бастап келді, осы кезеңде Аринаны қуып жете алған жалғыз спортшы қазақстандық Елена Рыбакина болды. Бұл ретте жеке кездесулер бойынша Беларусь спортшысы алда келеді (10:8).

Instagram-дағы бұл жарияланымды көру

WTA (@wta) жарияланымы

Корттағы және рейтингтегі бәсекелестіктен бөлек, жанкүйерлер әлемдегі ең мықты екі теннисшінің мінез-құлқы бір-біріне мүлдем қарама-қайшы екенін жиі айтады. Еленаны сабырлығы мен төзімділігі үшін жиі "мұзға" теңесе, Аринаны қызбалығы мен ашық мінезі үшін "жалынға" теңейді.

Қарсыластар бейресми жағдайда бір-бірі туралы көбіне құрметпен сөйлейді, бірақ қызуқандылықпен басқа да жайттар көрініс тауып қалады.

Елена 2023 жылдың наурызында АҚШ-тың Индиан-Уэллс қаласында өткен турнирде Аринаны алғаш рет жеңгеннен кейін, Соболенко марапаттау рәсімінде шоу жасады. Қазақстандық теннисші финалдағы қарсыласына құрмет білдіріп жатқанда, Арина тілін шығарып, трибунадағы жанкүйерлерді күлкіге қарық қылды.

Ал былтыр қазақстандық теннисші жеңіске жеткен WTA қорытынды турнирінің финалында Арина Соболенко эмоциясын тежей алмады. Елена Рыбакинаның кезекті сәтті соққысынан кейін Арина өз командасына қарап, "жылына бір рет таяқ та атады" деп мысқылдаған.

Tengri Sport-қа берген сұхбатында қазақстандық теннисші бұл сөз оған бағытталса да, қарсыласына ешқандай реніші жоқ екенін айтты.

"Матчтен кейін маған видеоларды жіберді, бірақ ол үзінді. Біз Аринамен көп рет, биылдың өзінде бірнеше мәрте ойнадық, сондықтан мен бұған аса мән бермеймін. Менің Аринаға да, оның командасына көзқарасым жақсы, сондықтан бұл сөздер маған бағытталған болса да, жүрегіме жақын қабылдамаймын", – деді Рыбакина.

Рыбакина мен Соболенконың келесі кездесуі WTA Қорытынды турнирінде өтуі мүмкін еді, бірақ қазақстандық спортшы турнирден бас тартып, қарсыласын таңғалдырды. Ал Арина топтан шыға алмай, әлемдік рейтингте ресейлік Мирра Андреевадан қалып қойды.