“Челсидің“ атақты ойыншысы мансабын аяқтағанын жариялады

Фото: szirtesi/depositphotos.comФото: szirtesi/depositphotos.com

Испаниялық жартылай қорғаушы Хуан Мата 38 жасында футболшы мансабын аяқтайтынын жариялады, деп хабарлайды Tengri Sport ойыншының әлеуметтік желідегі парақшасына сілтеме жасап.

Кейінгі жылдары Аустралия чемпионатында өнер көрсеткен атақты футболшы ойыншы ретіндегі жолы аяқталғанын әлеуметтік желіде әсерлі видео арқылы жариялады.

Ақ-қара түсті роликте Мата киім ауыстыратын бөлмедегі ілгішке бутсысын іліп, шығып бара жатады.

"Кейде жақсы көру... жіберуді білдіреді. Футболға рақмет!" - деп жазылған видео сипаттамасында.

Еуро, ӘЧ мен Чемпиондар лигасын жеңіп, Қазақстан құрамасына гол соққан

Жартылай қорғаушы өз мансабында мадридтік "Реал" академиясында, "Валенсия", "Челси", "Манчестер Юнайтед", "Галатасарай" клубтарында, сондай-ақ Жапония мен Аустралия командаларында ойнаған.

2012 жылы ол "Челсиге" алғаш рет Чемпиондар лигасын жеңіп алуға көмектесті. "Бавариямен" өткен сол матчте Дидье Дрогбаның құтқарушы голына пас шығарып, команданың қосымша уақытқа өтуіне мүмкіндік жасады.

Ал бір жылдан соң Еуропа лигасының жеңімпазы атанып, бұл жетістігін 2017 жылы "Манчестер Юнайтедпен" бірге қайталады. Қос клуб та мансабын аяқтау туралы жазба астында Матаға алғыс айтты.

"Ерекше естелік өте көп. Рақмет, Хуан", - деп жазды "Челси" аккаунты;

"Біз де сенімен бірге жұмыс істегенімізге қуаныштымыз. Сәттілік тілейміз, Хуан!" - деп атап өтті "Манчестер Юнайтед".

Бұдан бөлек, Мата Испания құрамасымен бірге тарихтағы ең мықты командалар бірінің сапында Еуропа және Әлем чемпионатын (2012 және 2010) жеңіп алды.

Мата 2008 жылы Қазақстанға да келді - U-21 жастар құрамасымен бірге Алматыда Еуро-2009 іріктеу матчінде (2:1) жеңіске жеткен.

Фото: Испания құрамасының мұрағаты.

Сондай-ақ Еуропа лигасында ағылшындардың мықты клубымен бір топқа "Астана" түскен кезде Мата "Манчестер Юнайтед" сапында болған. Ол Қазақстан астанасына келмеді, бірақ "Олд Траффордта" қосалқы құрамнан шығып, біздің командаға қарсы 30 минуттай ойнады.

Былтырғы маусымда аустралиялық "Мельбурн" сапында Мата 24 матчке қатысып, 5 гол және 12 нәтижелі паспен көзге түсті.

Instagram-дағы бұл жарияланымды көру

Juan Mata (@juanmatagarcia) жарияланымы

“Мінсіз“: Еуропа “Қайрат“ ойыншыларына тәнті болды

Ла Лига басшысына қатысты оқиғадан кейін “Реалдың“ басы дауға қалды: қандай жаза қолданылмақ?