ӘЧ-де жеңіске жеткені үшін қазақстандық балуандарға қомақты сыйақы беріледі

Бүгін ОКҚ-да күрестен алдағы әлем чемпионатына арналған баспасөз мәслихаты өтті. Федерация өкілінің айтуынша, спортшылардың жүз мыңдаған доллар табыс табуға мүмкіндігі бар.

"Федерацияда ересектер арасындағы Азия және әлем чемпионаттары үшін сыйақы мөлшері белгіленген. Қазан айында өтетін осы әлем чемпионаты үшін келесідей сыйақылар тағайындалды:

• алтын үшін – 100 мың доллар;
• күміс үшін – 50 мың доллар";
• қола үшін – 25 мың доллар", - деді Қазақстан күрес федерациясы бас хатшысының міндетін атқарушы Гүлбарам Құлахметова.

Еске сала кетейік, заңнамаға сәйкес олимпиадалық спорт түрлері бойынша әлем чемпионатының медальдары үшін де ақшалай төлемдер қарастырылған. Алтын медаль үшін спортшы 15 мың доллар, күміс үшін – 10 мың, қола үшін – 5 мың доллар алады.

Үйдегі әлем чемпионатында Қазақстан құрамасының сапында кімдер өнер көрсетеді?

Баспасөз мәслихаты аясында ұлттық құраманың турнирге қатысатын құрамы туралы да сұрақ қойылды.

2026 жылғы әлем чемпионаты мен Азия ойындарының өту мерзімі бір-біріне жақын: әлемдік біріншілік 24 қазан мен 1 қараша аралығында, ал Азиада – 19 қыркүйек пен 4 қазан аралығында өтеді.

"Қатысушылар туралы айту әлі ерте. Бізде жаттықтырушылар кеңесі бар, қай турнирге кімнің лайықты екенін солар шешеді", - деп атап өтті Қазақстан күрес федерациясының төрағасы Еркін Оқасов.

Еске салсақ, Азиадада күрестің барлық түрінен алты салмақ дәрежесі, ал әлем чемпионатында он салмақ дәрежесі болады.

Күрестен Қазақстан құрамасында үш әлем чемпионы бар - Айдос Сұлтанғали (грек-рим), Ризабек Айтмұхан және Нұрқожа Қайпанов (еркін күрес).

Айта кетейік, бастапқыда 2026 жылғы күрес түрлерінен әлем чемпионатын Манамада (Бахрейн) өткізу жоспарланған болатын. Кейіннен UWW Бахрейн күрес федерациясымен бірлесе отырып, турнирдің ауыстырылатынын хабарлады. Әлемдік біріншілікті өткізу құқығын Бішкекті (Қырғызстан) артқа тастаған Астана жеңіп алды. Чемпионат өтетін орын ретінде "Барыс Арена" таңдалды.

Қазақстандық боксшылар Әлем чемпионатындағы жеңісі үшін 8 айдан кейін сыйақы алды