21 қарашада Дохада (Қатар) UFC Fight Night 294 турнирінің басты карды аясында қазақстандық ең жеңіл салмақ файтері Асу Алмабаев жапондық Киоджи Хоригучимен кездеседі.
UFC баспасөз қызметіне берген сұхбатында ол көпшілік оның дағдылары мен жеңістеріне күмәнмен қарайтынын, сондықтан бұл жекпе-жек керісінше дәлелдеудің жақсы жолы болатынын атап өтті.
"Мен жеңіске, яғни табанды айқастағы жеңіске лайық екенімді дәлелдеу үшін соңына дейін жұмыс істеуге бел будым. Көп адам маған күмәнмен қарайтын сияқты көрінеді. Олар менің шеберлігіме және кейбір жеңістеріме күмәнданады, бірақ меніңше, бұл жекпе-жек – менің неге қабілетті екенімді, қаншалықты әмбебап файтер екенімді және өзім тиісті орында тұрғанымды көрсетудің тамаша мүмкіндігі", - деді Асу Алмабаев.
Алмабаев қарсыласына қатысты тек құрметпен сөйледі. Қазақстандық спортшы Хоригучидің ұлылығын және оның ММА-ға қосқан үлесін мойындайды.
"Мен үшін бұл - тамаша мүмкіндік. Ол - аңыз адам және ММА-да өнер көрсетіп жүргеніне көп болды. Ол мықты файтер, сондықтан осындай деңгейдегі адаммен жекпе-жекте өзімді көрсету мен үшін жақсы идея. UFC-дегілер не істеп жатқанын біледі. Олар жайдан-жай чемпиондық белбеуге таласуға мүмкіндік бермейді. Алдымен сенің осы деңгейге лайық екеніңді және белбеу үшін жұдырықтаса алатыныңды тексеру үшін Хоригучи сияқты қарсыласпен шығарады. Мен бұл жекпе-жек титулға қарай ілгерілеуім керектігін дәлелдейтін жақсы мүмкіндік болады деп есептеймін", - деп бөлісті файтер.
Бұл жекпе-жекте Алмабаев жылдам жеңіске жетуді мақсат еткен. Қазақстандық спортшы ММА-ның жапондық ардагерін мерзімінен бұрын жеңіп, бонус алуды жоспарлап отыр.
"Үстемдік танытып, оны ертерек аяқтау керек. Әсерлі өнер көрсетіп, сол үшін бонус - біраз ақша табу керек", - деп қосты Алмабаев.
Киоджи Хоригути - ММА ардагері
Киоджи Хоригути - жапондық аралас жекпе-жек шебері, аса жеңіл және өте жеңіл салмақ дәрежелеріндегі ең тәжірибелі әрі атақты файтерлердің бірі. 1990 жылы 12 қазанда Такасакиде (Жапония) дүниеге келген. Кәсіби мансабын 2010 жылы бастаған.
UFC-дегі дебютін 2013 жылы жасап, тез арада титулға үміткер атанды. 2015 жылы чемпиондық белбеу үшін Деметриус Джонсонмен жұдырықтасып, тек бесінші раундта ғана есе жіберді. UFC-ден кеткеннен кейін Хоригути RIZIN және Bellator ұйымдарында сәтті өнер көрсетті: ол RIZIN-нің екі салмақтағы чемпионы және Bellator-дың өте жеңіл салмақтағы чемпионы атанды.
2025 жылы ардагер файтер UFC-ге оралып, жоғары деңгейде өнер көрсетуін жалғастырды. Хоригутидің стилі жылдамдыққа, соққы дәлдігіне және мықты күреске негізделген - бұл қасиеттер оған 15 жылдан аса уақыт бойы бәсекеге қабілетті болуға мүмкіндік берген.
Асу Алмабаев - UFC-дегі қазақстандықтар арасында үздік
Асу Алмабаев - Жамбыл облысының Жанаталап ауылында дүниеге келген 32 жастағы файтер. Қазіргі уақытта ол UFC рейтингінің топ-15 тізіміне енген еліміздің жалғыз өкілі (UFC-дің ең жеңіл салмақ рейтингінде 7-ші орында).
Еске сала кетейік, Асу Алмабаев соңғы рет октагонға 28 маусымға қараған түні Бакуде (Әзербайжан) өткен UFC Fight Night 280 турнирінде шыққан болатын. Онда қазақстандық файтер америкалық Чарльз Джонсонды мерзімінен бұрын жеңді.
Жекпе-жектің үшінші раундында Алмабаев қарсыласын партерге түсіріп, сирек кездесетін "Сулоев созылуы" әдісімен жеңіске жетті.
Бұл әдіс - UFC тарихындағы ең сирек қолданылатын тәсілдердің бірі. Промоушен тарихында бұл әдіс бұған дейін небәрі 3 рет жасалған болса, Асу оны 4-ші болып орындады.
“Белбеуге жол ашады“: Асу Алмабаевтың UFC-дегі жаңа қарсыласы туралы не белгілі?