“Ақтөбе“полиция шешімінен кейін даулы плакат ұстаған жанкүйер қыздарды қолдады

Клуб Ақтөбедегі матч кезінде "Ордабасы" жанкүйерлерін қорлайтын плакат үшін айыппұл арқалаған қыздардың шығынын өтейтінін мәлімдеді. Сонымен бірге клуб команда мен оның жанкүйерлері барлық нәсіл мен ұлт өкілдерін құрметтейтінін атап өтті.

"Біз, "Ақтөбе" футбол клубы, футбол әлеміне әрдайым үлкен құрметпен қараймыз. Біздің жанкүйерлеріміз бен футболшыларымыз барлық ұлт пен нәсіл өкілдерін сыйлай біледі. Біз - ауызбіршілігі мықты ұжымбыз, ал командамыз - ұлтаралық достықтың жарқын үлгісі. Жекелеген тұлғалардың көзқарасы клубтың ұстанымын білдірмейді. Футбол - араздық емес, бірлік алаңы. Әрбір жанкүйерді клубтың намысын қорғауға, бір-бірін сыйлауға және спорттық этиканы сақтауға шақырамыз", - делінген клубтың алғашқы мәлімдемесінде.

"Біз қыздарымызды қолдаусыз қалдырмаймыз. "Ақтөбе" футбол клубы үшін әрбір жанкүйер маңызды. Клуб айыппұл арқалаған алты қыздың барлық шығынын толық өтейді. Қыздарымыз өз қателіктерін толықтай түсінді. Олар команданы алдағы уақытта да қолдауға және келесі жолы қатаң түрде "ереже бойынша" әрекет етуге уәде берді", - деді "Ақтөбе" клубындағылар.

"Ақтөбе" - "Ордабасы" матчіндегі плакат дауы: не болды?

Еске сала кетейік, "Ақтөбе" - "Ордабасы" матчінен кейін әлеуметтік желілерде трибунадан көрінген плакатқа қатысты дау туындаған болатын. Ақтөбелік клубтың жанкүйер қыздары ұлттық белгіні қорлады деп айыпталды.

Матчтен екі күн өткеннен кейін полиция қыздардың табылғанын хабарлады. Олардың кәмелетке толмағаны анықталып, ата-аналарының қатысуымен профилактикалық әңгіме жүргізілді. Жанкүйерлердің ата-аналары әкімшілік жауапкершілікке тартылды.

Қазақстан футбол федерациясы болған жағдайға қатысты ешқандай реакция білдірген жоқ.

Полиция "Ақтөбе" - "Ордабасы" матчінде даулы плакат ұстаған қыздарды тапты