“Ақымақ адамдар“ - “Қайрат“ бапкері еурокубоктағы жеңілістен кейін айтылған сын туралы

Конференция лигасындағы ойсырай жеңілістен кейінгі баспасөз мәслихатында Оразбахтин сынға қатысты қатаң пікір білдірді.

"Қазіргі деңгейіміз осындай. "Панатинаикос" осы маусымдағы ең қиын қарсыласымыз шығар. Оларға төтеп беру мүмкін емес деп айтпас едім. Бірақ оларда шеберлік бар, олар бізге қарағанда қақпаға аз соққы жасаса да, бес гол соқты.

Жанкүйерлер "қашанға дейін шыдауға болады" деп айқайлап жатыр ма? Не "қашанға дейін"? Меніңше, біз сапалы әрі батыл ойын көрсеттік. Бұлай айқайлап жүргендер футболды түсінбейді. Олар ол жерде айқайлағанымен, футболдан хабары жоқ. Жігіттер тырысты, барын салды. Мұндай сөздерді айтатындар - ақылсыз адамдар", - деп басылым Оразбахтиннің сөзін келтіреді.

Айта кетейік, өткен маусымда Оразбахтин бастаған "Қайрат" қатарынан екінші рет Қазақстан чемпионы атанып, тарихында тұңғыш рет Чемпиондар лигасының ортақ кезеңіне жолдама алған болатын.

Биыл Оразбахтиннің командасы ел чемпионатында жеңіске жету мүмкіндігінен айырылып қала жаздады, ал Еуропада тек Конференция лигасының ортақ кезеңіне өте алды. Екі матчтен кейін "Қайраттың" еншісінде 1 ұпай бар және турнир кестесінде 31-орында тұр.