Әлімханұлы Көшпенділер ойындарының финалы қарсаңында Қазақстан құрамасына үндеу жасады

Фото © Tengrinews.kz / Тұрар Қазанғапов

Жеңіліп көрмеген қазақстандық боксшы Жәнібек Әлімханұлы Дүниежүзілік көшпенділер ойындарының финалына шыққан көкпардан Қазақстан құрамасына үндеу жасады, деп хабарлайды Tengri Sport.

Жәнібек Әлімханұлы әлеуметтік желідегі парақшасында VI Дүниежүзілік көшпенділер ойындарының финалына жолдама алған көкпардан Қазақстан ұлттық құрамасына қолдау білдірді. Боксшы спортшыларға алтын үшін таласта сәттілік тілеп, жарақатсыз өнер көрсетулеріне тілектестік білдірді.

"Қырғыз еліндегі Көшпенділер ойындарында өнер көрсетіп жатқан еліміздің рухты спортшыларына тек сәттілік! Көкпаршылар финалға шығып, қуанып жатырмыз. Жарақатсыз, ат сүрінбей жеңіске жетіңіздер! Тақым қысып отырмыз!" - деп жазды Әлімханұлы.

Скриншот: instagram.com/janibek_alimkhanuly

Еске сала кетейік, көкпардан Қазақстан құрамасы VI Дүниежүзілік көшпенділер ойындарының финалына шықты. Кейінгі матчте олар Мажарстан құрамасын 9:4 есебімен тізе бүктірді. 6 қыркүйекте өтетін шешуші кездесуде қазақстандық көкпаршылар Қырғызстан командасымен кездеседі.

Instagram-дағы бұл жарияланымды көру

Публикация «QAZSPORT» телеарнасының ресми парақшасынан (@qazsport_official)

Айта кетейік, биылғы Дүниежүзілік көшпенділер ойындары 31 тамыз бен 6 қыркүйек аралығында Қырғыз Республикасының Ыстықкөл облысында өтіп жатыр.

Жарысқа 100-ден астам елден 3000-ға жуық спортшы қатысады. Қазақстан намысын Ойындарда 150-ден астам спортшы қорғап жатыр. Отандастарымыз спорттың барлық 43 түрінен бақ сынайды.