“Астана“ БК бас бапкері өмірден өтті

"Астана" баскетбол клубының бас жаттықтырушысы Рамунас Цвирка өмірден озды. Ол 59 жаста еді, деп хабарлайды Tengri Sport

"Астана" баскетбол клубы команданың бас жаттықтырушысы - 59 жасқа қараған шағында қайтыс болған Рамунас Цвирканың қазасына байланысты қайғырып көңіл айтады. Рамунас Цвирка саналы ғұмырының басым бөлігін баскетболды дамытуға арнаған тәжірибелі тәлімгер болды", - делінген клуб хабарламасында.

Оның жетекшілігімен команда жоғары кәсіби деңгей мен нәтижеге деген ұмтылыс көрсеткені атап өтіледі.

"Оның клуб пен ойыншылардың дамуына қосқан үлесі орасан зор. Клуб ұжымы, ойыншылар мен басшылық осынау ауыр қайғыға байланысты Рамунас Цвирканың отбасы мен жақындарына шын жүректен көңіл айтады", - деді клуб өкілдері.

Рамунас Цвирка бапкерлік мансабын 2004 жылы бастаған. Ол "Азовмаш" сапында жүріп, 2008 жылғы Украина чемпионы және Кубогының иегері атанды. Сондай-ақ оның қоржынында "Химки-2" командасымен ВТБ жастар лигасы мен EYBL U20 турнирлеріндегі жеңістері бар. Цвирканың бастауымен 2018 жылы "Невежис" командасы Еурокубоктың үздік 16 командасының қатарына (топ-16) енген болатын.

Ол Қазақстанда да айтарлықтай жетістіктерге жетті: 2023/24 маусымында ел чемпионы атанса, 2024/25 жылғы маусымда күміс жүлде иеленді. Көрсеткен нәтижелері үшін ол екі рет еліміздің үздік жаттықтырушысы болып танылды.

2025 жылдан бері Цвирка "Астана" баскетбол клубымен жұмыс істеп келеді. Оның басшылығымен астаналық команда Ұлттық лига плей-оффының жартылай финалына шықты.