+7 (777) 001 44
99
Бұған дейін қайғылы оқиға 10 тамызда кешке болғаны айтылған еді.
Астанада баланың үстіне футбол қақпасы құлады: мән-жайы белгілі болды
Tengri Sport тілшісі мән-жайды анықтау үшін Астана Полиция департаментіне хабарласты. Ведомство берген жауапта дерек бойынша қылмыстық іс қозғалғаны айтылған.
"9 жастағы баланың үстіне футбол қақпасының құлау дерегі бойынша қылмыстық іс қозғалды. Жаттығу кезінде баланың футбол қақпасына асылып тұрғаны, салдарынан конструкция оның үстіне құлағаны анықталды.
Бала жарақат алған, оған қажетті медициналық көмек көрсетіліп жатыр. Қазіргі уақытта тергеу амалдары жүргізіліп, оқиғаның барлық мән-жайы анықталып жатыр", - деп жауап берді Астана ПД Tengri Sport сұрауына.
Қазақстан футбол федерациясы (ҚФФ) бұған дейін ұйым құзырлы органдарға көмектесуге дайын екенін мәлімдеген болатын. Ал Астана қалалық денсаулық сақтау басқармасы біздің сауалымызға баланың жағдайы әлі де ауыр екенін хабарлады.
"Бала жансақтау бөлімінде жатыр. Жағдайы ауыр деп бағаланып отыр. Барлық қажетті қарқынды терапия жүргізіліп, бала толық көлемде медициналық көмек алып жатыр", - деп нақтылады ведомствоның баспасөз қызметі біздің сауалымызға берген жауабында.
Қазақстандағы қақпаға қатысты оқиғалар: Астанадағы жағдай алғашқы емес
Айта кетейік, Қазақстан футбол федерациясы алаңындағы бұл оқиға еліміздің түкпір-түкпірінде болған осындай жағдайлардың кезектісі болды.
2023 жылы №10 мектеп аумағында 10 жасар баланың үстіне футбол қақпасы құлап, оқушы алған жарақаттарынан көз жұмған болатын.
Осыған ұқсас тағы бір жағдай Ақтауда болды - онда 16 жасар жасөспірімнің үстіне қақпа құлап, ол комаға түсіп, кейін қайтыс болды.
Осындай оқиғалар Теміртау, Қарағанды, Көкшетау және Қазақстанның басқа да қалаларында тіркелген.
Сол кезде балалардың жарақат алуына немесе өліміне әкеп соқтырған бірнеше ұқсас оқиғадан кейін Tengrinews тілшісі бұл жағдайға көбіне балалар емес, жұмысты адал атқармаған мердігерлер кінәлі деген қорытынды жасаған болатын.
"Тәжірибе көрсеткендей, спорт алаңдарында балалардың үстіне футбол қақпасы құлағаннан кейін полиция көбіне қауіпсіздік талаптарына сай келмейтін жұмыстарды орындау және қызметтер көрсету фактісі бойынша сотқа дейінгі тергеу амалдарын жүргізеді. Соның барысында қақпаның тиісінше дәнекерленбегені немесе бекітілмегені анықталады.
Мұндай жағдайларда спорттық құрал-жабдықты орнатуға жауапты мердігерлер кінәлі деп танылады. Оларға олқылықты жою міндеттеледі. Бірақ компаниялардың жұмысын кім тексеретіні белгісіз. Қарағандыда бір ауданда бір жыл салып болған оқиғалар тексерістің жеткілікті деңгейде жүргізілмейтінін немесе мүлдем жүргізілмейтінін көрсетеді", - делінген материалда.
