Асу Алмабаевтың UFC-дегі келесі жекпе-жегі өтетін күн белгілі болды

Бейнеден алынған кадрлар

Қазақстандық файтер Асу Алмабаевтың бапкері Эдуард Базров Tengri Sport-қа берген сұхбатында шәкіртінің UFC-дегі келесі жекпе-жегі өтетін күнді айтты.

Tengri Sport тілшісімен әңгімелесу барысында қазақстандық спортшылардың танымал бапкері Эдуард Базров UFC-дің ең жеңіл салмақтағы файтері Асу Алмабаевтың келесі кездесуі қашан өтетінін мәлімдеді.

"Бізде нақты күн бар – бұл 21 қараша. Бірақ әзірге қарсылас жоқ. Ұсыныс күтіп отырмыз. Бізге мықты қарсылас береді деп ойлаймын. Қазір дивизионның үздік бестігіндегі спортшылардың бәрі мықты. Солардың кез келгеніне дайындаламыз", - деді Базров Tengri Sport-қа берген сұхбатында.

Instagram-дағы бұл жарияланымды көру

ASU ALMABAYEV (@asu_zulfikar57) жариялаған жазба

Алайда, жекпе-жек күні белгілі болғанымен, Алмабаевтың қарсыласы әлі анықталған жоқ. Жаттықтырушының айтуынша, бұған дейін үміткер болған Брэндон Ройвал жарақатына байланысты кездесуден бас тартқан.

Сондай-ақ бұл бас тарту Ройвалдың әйелінің аяғы ауыр болуына да байланысты болуы мүмкін.

"Бізге жуырда қарсылас беретінін айтты, сондықтан күтіп жүрміз. Бірақ бұл Ройвал болмайтын шығар, өйткені ол жарақат алғанын және әйелінің аяғы ауыр екенін айтты. Ройвал тарапынан жағдай осындай", - деп толықтырды жаттықтырушы.

Еске сала кетейік, UFC 329 турнирінде америкалық Брэндон Ройвал британдық файтер Лонэ Кавананы қылқындыру әдісімен жеңгеннен кейін, қазақстандық Асу Алмабаевты жекпе-жекке шақырған болатын. Ройвал "Зулфикарға" құрмет көрсетіп, оны үздік деп атады және онымен күш сынасуға ниет білдірген еді.

"Асу Алмабаев, кеттік. Сен үздіксің, мықтысың. Мен сенімен төбелескім келеді, өйткені сен өте мықтысың, бауырым", - деді Ройвал жекпе-жектен кейін.

Instagram-дағы бұл жарияланымды көру

UFC on Paramount+ (@ufconparamount) жарияланымы

Эдуард Базров бұған дейін де Tengri Sport-қа берген сұхбатында америкалық файтер туралы оң пікір білдірген.

"Жақсы спортшы, жан-жақты, күресі де, тыныс алуы да, соққы техникасы мен футворкы (аяқпен жұмыс істеуі - ред. еск.) да мықты. Біз үшін бұл өте жақсы сынақ және титулға бір табан жақындауға мүмкіндік", - деп ой бөлісті Базров.

Instagram-дағы бұл жарияланымды көру

Eduard Bazrov-тың жазбасы (@eduard_bazrov15)

Асу Алмабаев кейінгі рет октагонға 28 маусымға қараған түні Бакуде (Әзербайжан) өткен UFC Fight Night 280 турнирінде шыққан болатын. Онда қазақстандық спортшы америкалық Чарльз Джонсонды мерзімінен бұрын жеңді.

Жекпе-жектің үшінші раундында Алмабаев қарсыласын партерге түсіріп, сирек қолданылатын "Сулоев созу" әдісімен жеңіске жетті.

Бұл UFC тарихындағы ең сирек қолданылатын тәсілдердің бірі. Промоушен тарихында бұл әдіс бұған дейін небәрі 3 рет жасалған болса, Асу оны 4-ші болып орындады.