Айбек Оралбай Азия ойындарының финалына ірі жеңіспен шықты

Жартылай финалдық жекпе-жекте бокстан Қазақстан ерлер құрамасының капитаны үндістандық Нарендермен кездесті.

Жекпе-жек барысы

Алғашқы раунд барлаудан басталды: боксшылар қажетті арақашықтықты іздеп, бірден айқасқа түсуге асықпады. Оралбай қарсыласының шабуылдарынан қорғана жүріп, жекелеген соққыларға мән берді және ұзақ комбинациялар жасады. Нарендер болса, қазақстандықтың денесінен ұруға тырысты. Раунд аяқталар тұста Оралбай бірнеше дәл комбинация жұмсап, қарсыласынан сәтті қорғанды. Төрешілер жеңісті бірауыздан қазақстандыққа берді - 5:0.

Екінші раундта үндістандық боксшы белсенділікті арттырғанымен, бұл басымдықты сақтап қалуға жеткіліксіз болды. Оралбай жүйелі түрде шабуылдап, қарсыласын арқанға тақады және дәл соққылар сериясын жасады. Қазақстандық Нарендердің тигізбек болған барлық әрекеттерінен сытылып кетіп отырды. Екінші раундта да төрешілер 5:0 есебімен жеңісті қазақстандыққа берді.

Шешуші кезең де дәл осындай сценариймен өтті: қазақстандық рингте үстемдік етіп, өзіне соққы дарытпастан қарсыласын соққының астына алды. Раундтың аяқталуына бір минут қалғанда Айбектің соққысы дөп тиіп, төреші қарсыласын нокдаунға есептеді. Нәтижесінде Айбек Оралбай 5:0 есебімен айқын жеңіске жетіп, Азиада финалына жолдама алды.

Еске сала кетейік, ширек финалда Айбек Оралбай Қырғызстан өкілі Мырзакир Кошалиевпен кездесіп, төрешілердің бірауыздан шығарған шешімімен 5:0 есебімен сенімді жеңіске жеткен болатын.

Жекпе-жек барысында Оралбай кездесу тізгінін өз қолында ұстап, жүйелі түрде дәл соққылар бағыттады және қарсыласына өз айқас мәнерін таңуға мүмкіндік берген жоқ.

Айбек Оралбай - әлем чемпионы

Айта кетейік, Айбек Оралбай бокстан әлем чемпионы. Ол 2025 жылдың қыркүйегінде Ливерпульде (Англия) World Boxing нұсқасы бойынша өткен әлем чемпионатында 90 келіден жоғары салмақ дәрежесінде өзбекстандық боксшы Жахонгир Зокировты 3:2 есебімен жеңіп, алтын медаль иеленген болатын.

Сондай-ақ Айбек Оралбай - Азияның үш дүркін чемпионы (Амман-2022, Чиангмай-2024, Ұлан-Батор-2026).

Ал 2026 жылдың маусымында Қытайда өткен Әлем кубогында германиялық Никита Путиловты айқын басымдықпен жеңіп, алтын жүлдеге ие болды.