Азиада-2026-дағы Қазақстан құрамасының басты жұлдыздары: кімдер медаль әкеледі?

Олимпиада чемпионы және әлем чемпиондары

Қазақстан құрамасы Жапонияға жазғы спорт түрлерінен өзінің басты үздіктерін апарды. Әсіресе бокс құрамасы ерекше көз тартады: әлемнің екі дүркін чемпионы Абылайхан Жүсіпов пен Санжар Тәшкенбайға бұл командадан орын табылған жоқ.

Бокстан Қазақстанның ерлер құрамасында Азия ойындарына әлем чемпионы атағы бар бес спортшы бара жатыр: олар – әлемнің екі дүркін чемпионы Махмұд Сабырхан, Оразбек Асылқұлов, Төрехан Сабырхан, Нұрбек Оралбай және Айбек Оралбай.

Әйелдер құрамасында төрт чемпион бар, олардың арасында үш дүркін әлем чемпионы Назым Қызайбай, сондай-ақ екі дүркін чемпиондар Алуа Балқыбекова мен Аида Әбікеева бар. Наталья Богданованың еншісінде әзірге бір титул.

559 адамнан тұратын бүкіл делегацияның ішінде Елдос Сметовтың орны бөлек – ол командадағы жалғыз Олимпиада чемпионы. Сметов 2014 жылғы Азия ойындарында жеңіске жеткен, енді ол екінші алтынына бара жатыр. Қызығы, Сметов Азия ойындарынан кейін бірнеше күннен соң басталатын әлем чемпионатына қатыспайды.

Сайысқа семсерлесуден тарихи әлем чемпиондары толық құрамда аттанады: Ерлік Сертай, Кирилл Проходов, Вадим Шарлаимов және Руслан Құрбанов жапон жерінде алаң иелерімен қайта кездесуі мүмкін.

Сондай-ақ турнирге еркін күрестің танымал өкілдері, әлем чемпиондары Ризабек Айтмұхан мен Нұрқожа Қайпанов барады.

Азия ойындарына қатысатын тағы бір әлем чемпионы – ауыр атлет Нұрғиса Әділетұлы.

Жеңіл атлетикадан Қазақстанның көпшілік құрамасының ішінен Нора Джерутоны атап өткен жөн – бұл легионер спортшы 2022 жылы 3 мың метрге кедергілер арқылы жүгіруден әлем чемпионатының алтынын иеленген болатын.

Азия ойындарында көркем жүзуден Қазақстаннан шыққан тұңғыш әлем чемпионы Наргиза Болатова бар.

Теннис пен MMA жұлдыздары да Азия ойындарына қосылды

Қазақстандық қатысушылар ішіндегі ең танымалдарының бірі – теннисші Юлия Путинцева болмақ. Ұлттық құраманың екінші нөмірі және әлемнің 78-ракеткасы Жапонияға өзінің екінші Азиада жүлдесі үшін барады – оның қоржынында 2014 жылғы қола медаль бар.

Бұдан бөлек, Азия ойындарында Қазақстандағы ең танымал спорт түрлерінің бірі – аралас жекпе-жек (MMA) ұсынылады. Бұл салада 21 мың оқырманы бар UAE Warriors қатысушысы Санжар Әділовті ең танымал спортшы деп атауға болады.

Еске салайық, XX жазғы Азия ойындары 19 қыркүйек пен 4 қазан аралығында өтеді. Ресми ашылу салтанаты 19-ы күні Нагоя қаласында болады.

Жарыстардың бір бөлігі ертерек басталды: мәселен, Қазақстан баскетбол құрамасы топтық кезеңде үш матч өткізіп үлгерді және ресми ашылу салтанатына дейін-ақ плей-оффқа шығу мүмкіндігінен айырылып қалды.