БАҚ бас демеуші “Астанадан“ бас тартқанын хабарлады: мән-жайы

Сурет Midjourney нейрожелісінің көмегімен жасалған

Бірнеше еуропалық БАҚ "Астана" велокомандасының қытайлық инвесторы - XDS - келісімшартты бұзып, қолдауды тоқтатуы мүмкін екенін хабарлады. Tengri Sport Туризм және спорт министрлігіне сауал жолдады.

Француздық Lequipe бірнеше күн бұрын қытайлық демеуші келісімшартты бұзып, әлемдік рейтингте XDS Astana-ның жоғары (алтыншы) сатыда тұрғанына қарамастан, басқа әлемдік тур велокомандасына инвестиция сала бастауы мүмкін екендігі туралы мақала жариялады.

"Біздің дереккөздеріміздің мәліметінше, 2025 жылы Astana-ға қосылған қытайлық XDS велосипед өндірушісі қазіргі уақытта команда құрамынан шығу мүмкіндігін қарастырып жатыр. Шамасы, бұл 2027 жылы болуы мүмкін және бірнеше дереккөздің айтуынша, қытайлық басшылық тіпті әлемдік пелотонның басқа командасына қосылуды көздеп отыр.

Спорттық менеджер Александр Винокуров пен бүкіл қазақстандық ұйым үшін бұл үлкен соққы болар еді, әсіресе кейінгі екі маусымдағы айтарлықтай спорттық нәтижелерін ескерсек. XDS-тің кету себептері әлі де толық түсініксіз", - деп жазған басылым.

Айта кетейік, XDS қазақстандық велокомандамен келісімшартқа отырғаннан кейін "Астананың" бас менеджері Александр Винокуров қытайлық инвесторлар бюджеттің 60 пайызын жабатынын, ал қалған 40 пайызын "Самұрық-Қазына" қоры төлеуді жалғастыратынын, соған қарамастан команда қазақстандық болып қала беретінін мәлімдеген еді.

"Бүгінгі таңда біздің бюджет 22 миллион еуроны құрайды (шамамен 12 миллиард теңге – ред. ескертпесі). Бұл тіпті орташа бюджеттен де төмен, ал көшбасшыларда қазір 55-60 миллион еуро. Егер 10 жыл бұрын 20 миллионмен гранд-турларды сенімді түрде жеңуге болатын болса, бүгінде, өкінішке қарай, статистика басқаша. Жетпістен аса шабандоз маусымына миллион еуродан аса табыс табады", – деді Винокуров Tengri Sport-қа берген сұхбатында.

– Ал осы 22 миллионның 60 пайызын қытайлық тарап, 40 пайызын – өзіңіз бұған дейін айтқаныңыздай, "Самұрық-Қазына" қоры салып отыр. Осыған байланысты "Астана" велокомандасының лицензиясы қазір қазақстандық па әлде қытайлық па?

– Қазақстандық, қазақстандық. Бүгінгі таңда команданың тіркеуі қазақстандық. Егер Халықаралық велосипедшілер одағының мәліметін ашсаңыз, Қазақстанды көресіз, – деп атап өтті Винокуров.

Tengri Sport Қазақстанның басты велокомандасын қаржыландырудағы ықтимал мәселелерге қатысты Қазақстан Туризм және спорт министрлігіне жүгінді.

– Шетелдік БАҚ-та қытайлық инвесторлар "Астана" велокомандасынан кетуі мүмкін деген ақпарат пайда болды. Министрлік бұл ақпараттың қаншалықты негізді екенін және команда басты демеушісіз қалған жағдайда ведомство тарапынан қолдау көрсетіле ме?

– Ақпарат шындыққа жанаспайды, – деп сендірді министрлік.

Сонымен қатар велокоманданың өзі бұл жағдайға әзірге жауап берген жоқ. Дегенмен, жақында командада жаңа маңызды тағайындау болды – Азия ойындарының алты дүркін чемпионы, қазақстандық Алексей Луценко бас жаттықтырушы болып тағайындалды.

"Шабандоздықтан команда жаттықтырушысына дейінгі жол оңай болмайтынын, тәжірибе жинақтау және жаңа қалыпқа түсу үшін уақыт керек екенін білемін. Бірақ, мен өзіме, өз күшіме, біліміме сенемін және қажырлы еңбекпен бәрі де нәтижелі болатынына сенімдімін.

Артымда үлкен спорттық тәжірибе бар екенін білемін, сонымен жобаның жас шабандоздарымен де, кешегі командалас достарыммен де бөліскім келеді. 2027 жылы ортақ командалық мақсаттарымызға қол жеткізу жолында командаға пайдалы бола аламын деп үміттенемін", – деді ол команданың баспасөз қызметіне берген сұхбатында.

Айта кетейік, ресми сайттағы мәлімет бойынша XDS Astana-ның негізгі құрамындағы 30 шабандоздың ішінде Қазақстанның үш өкілі бар: Николя Винокуров, Евгений Федоров және Антон Кузьмин. Салыстырмалы түрде айтсақ, командада Италияның 10 өкілі бар.

Instagram-дағы бұл жарияланымды көру

SYFORM (@syform) жариялаған жазба

Бұған дейін XDS Astana командасының басқарушы директоры лауазымына қазақстандық Яна Зель тағайындалған болатын. Бұл ретте Олимпиада чемпионы Александр Винокуров команданың бас менеджері қызметін сақтап қалды.

Пікірлер