Теннис жарыстарының көбіне қарағанда, Қорытынды турнирде спортшылар топтарға бөлінеді және олардың әрқайсысы кемінде үш кездесу өткізеді. Әр топтан үздік шыққан екі ойыншы жартылай финалға жолдама алып, чемпиондық атаққа таласады.
Жеребе қорытындысы бойынша Елена Рыбакина Уимблдон чемпионы, чехиялық Линда Носковамен және корт иелері - Коко Гауфф пен Джессика Пегуламен бір топқа түсті.
Сарапшының пікірінше, Елена Рыбакинаның топтағы барлық қарсыласын жеңіп қана қоймай, былтырғы атағын қорғап, турнир жеңімпазы атануға толық мүмкіндігі бар.
"Тамаша жеребе, бәрі керемет. Қағаз жүзінде топ өте мықты: маусымдағы үш "Үлкен дулыға" жеңімпазы, соңғы екі Қорытынды турнирдің чемпиондары, оған қоса нағыз күрескер Джессика Пегула бар. Кейбіреулер Рыбакина түскен топты "ажал тобы" деп атап жүр, бірақ Лена - қазіргі чемпион әрі әлемнің бірінші ракеткасы. Ол үшін, негізінен, ешқандай қиындық туындамауы тиіс. Жыл қорытындысы бойынша бірінші орынды иеленуіне кепілдік бар, сондықтан еркін ойнай алады. Ең бастысы - физикалық дайындығы сыр бермесе болғаны. Ленаның басты қарсыласы - оның өзі", – деп есептейді Андрей Пак.
Сонымен қатар Рыбакинаға алғашқы матчте-ақ Линда Носковаға қарсы жақсы нәтиже көрсету маңызды.
"Топ-ойыншылардың шоғырлануы өте жоғары, сондықтан алғашқы матчтың маңызы зор. Линда жас ойыншы, ал Ленаның жеке кездесулердегі басымдығы 3:0, сондықтан сенімді жеңіске жетіп, бірден топта көш бастау керек. Әрине, америкалықтармен өз жерінде ойнау қиынырақ болуы мүмкін, бірақ қайталап айтамын: Лена үшін ешқандай кедергі болмауы тиіс. Ол қазіргі таңда әлемдегі ең үздік теннисші және шеберлік деңгейі жағынан қазір Арина Соболенконы қоса алғанда, қалғандарының бәрінен асып түседі", – деп атап өтті сарапшы.
– Индиан-Уэллстегі өз корттары америкалықтарға көмектесе ме?
– Америкалықтарда ешқандай артықшылық болмайды. Тіпті Арина үшін өз тобында Ленаға қарағанда қиынырақ болады деп айтуға болады, өйткені оның тобы тактикалық тұзақтарға толы. Негізгі интрига да осында шығар. Бірақ Арина - "Индиан-Уэллс - 2026" жеңімпазы, сондықтан мұндағы корттар оған сәл көбірек қолайлы.
Еске сала кетейін, биыл ұйымдастырушылар бұл турнирдегі корт төсенішін тым жылдамдатып жіберді, сондықтан тамаша ойын болады деп күтіледі. Ленаның добын ойынға қосуы (подача) бұрынғыдан да пәрмендірек болады.
Интрига өте жоғары, бірақ Рыбакина - чемпион
WTA Қорытынды турнирінде осы маусымдағы ең үздік сегіз теннисші өнер көрсететінін еске саламыз. Топтық кезең аяқталғаннан кейін Рыбакина келесі төрттіктің 1-ші немесе 2-ші орнындағы ойыншысымен кездесуі мүмкін: Мирра Андреева (Ресей, "Ролан Гаррос" жеңімпазы), Арина Соболенко (Беларусь, әлемнің экс-бірінші ракеткасы), Элина Свитолина (Украина) және Каролина Мухова (Чехия).
Айта кетейік, 2026 жылы Рыбакина Индиан-Уэллс корттарында өнер көрсетіп, Пегула мен Свитолинаны жарыс жолынан шығарып, финалға дейін жеткен болатын, бірақ шешуші бәсекеде Арина Соболенкоға есе жіберді.
"Ленаның әлеуеті жетеді және ол былтырғы атағын қиындықсыз қорғайды деп ойлаймын. Мотивация жағынан ешқандай мәселе жоқ, өйткені осы маусымдағы Индиан-Уэллс финалы үшін қарымта қайтару керек. Ол кезде өкінішті жеңіліс болды, сондықтан жігері мықты. Интрига өте жоғары, супертурнир болады, бәрімізді осымен құттықтаймын. Елена Рыбакина - чемпион", – деп есептейді Андрей Пак.
Елена Рыбакина жыл қорытындысы бойынша әлемнің бірінші ракеткасы болып қалады
Қорытынды турнирдің қалай аяқталғанына қарамастан, қазақстандық теннисші маусым қорытындысы бойынша бірінші орынды иеленетініне кепілдік бергенін айта кеткен жөн. Оның басты қарсыласы - Беларусь өкілі, әлемнің экс-бірінші ракеткасы Арина Соболенко 1614 ұпайға қалып келеді.
Рыбакина қыркүйек айында US Open турнирінде жеңіске жеткеннен кейін әлемдік рейтингтің шыңына көтерілді.
Америкалық "Үлкен дулыға" турнирінен бөлек, Елена биыл Australian Open-де де үздік атанды.
Елена Рыбакинаның WTA Қорытынды турниріндегі кестесі
- 9 қараша, Қазақстан уақытымен 01:00: Рыбакина - Носкова (Чехия);
- 10 қараша, 23:00 - Рыбакина - Гауфф (АҚШ);
- 11 қараша, 23:00: Рыбакина - Пегула (АҚШ);
- жартылай финал мен финал 15-16 қараша.
*жарияланымда көрсетілген уақыт алдын ала берілген және өзгеруі мүмкін
Бұған дейін Қазақстанның бірінші ракеткасы Елена Рыбакина жеңіл жарақатына байланысты Жапониядағы турнирдің 1/4 финалынан бас тартқанын мәлімдеді.